【冷鋒到．有片】何廣沛禦寒要靠頸巾 森美保暖最重要竟然係……
過埋今晚，明早的氣溫最低將會跌落到6度，唔洗講大家嘅晚餐一定會留係屋企打下邊爐，煲仔飯同韓燒咁。《香港01》為此就訪問近期經常出現嘅李佳芯同森美，朱晨麗同何廣沛，問下佢地有咩方法保暖，大家睇完之後不妨可以學下！！當中森美更表示，「我嘅保暖方法最好就係攬住你心愛嘅人唔俾佢走，咁就最溫暖喇！」
攝影：黃國立
出名與太太Veronica感情勁好嘅森美，笑言現時發覺最好攬並唔係太太，「係我嗰囡，因為攬太太佢係就範，但囡囡係掙扎。咁掙扎嘅過程中都算係做運動，身體會更加熱。咁就攬會爭紮唔會俾你攬嗰女，就最good。」講起囡囡，森美即刻流露出冧爆嘅樣，「攬住嗰囡感覺係甜d，但好可惜嘅係對上一次囡囡幾時同我講，『daddy，我要攬住你。』嗰刻不知不覺已經唔見左，佢唔再俾我攬住，我再攬住佢嘅時候，身體都會有一段小小的距離，係男人最傷感傷痛嘅一刻。」
除了攬住囡囡，森美仲有一個保暖方法，就係食蛇羹！佢表示小時候係石硤尾讀書，放學之後都會去深水埗見到好多蛇王賣蛇，「所以我對蛇係有種情意結，冬天食蛇羹係好溫暖。作為一個香港人其中一個地道文化，幫襯下啲蛇王，食下蛇羹都會暖身。」
虛寒體質嘅Ali，成日好易就好凍，每日拍劇褲同衫都會著幾件打底，「因為開始發覺女生要保持身體嘅體溫好緊要，咁所以除非無辦法要著呢啲衫，其實我入面都包晒，有暖包。」Ali笑言平時唔開工，又遇著咁凍嘅天氣，係會由頭包到上頸，「頸好緊要，你條頸覺得暖，成身都會暖。頸凍嗰話，著幾多衫都凍。」Ali其後亦有提醒大家除了頸部之外，腳眼位都好重要，「中醫角度來說，呢嗰位入風都係唔好。」
下星期新劇《平安谷之詭谷傳說》即將出街嘅朱晨麗，講到保暖，佢就話必備「貼暖包，暖手蛋，暖壺」。最令Morning朱佩服的一定係TVB的攝影師，「佢地嘅機係比較重，成日都要搬搬抬抬，運動得太多會出汗。」而Morning朱最鍾意就係打邊爐，「嚟香港之後，發覺無論係冬天定夏天，個個人都打邊爐，而且而家仲要有兩個煲，好perfect！」
自言細個完全唔怕死，就算天氣幾凍都著勁少衫嘅何廣沛就話而家開始驚，「我嗰tips係一定帶頸巾，好多時著勁多衫都好，出到街攝到好容易病。去到室外帶條頸巾，暖住條頸，身體應該無乜事！」至於咁凍天氣食乜最好？Matthew話當然係打邊爐，雞煲，韓燒或者是煲仔飯「可能會有人食壽司，但呢d始終唔暖胃，冬天奢侈啲喇，食下雞煲！！」