【愛要及時】小S憶已過世爸爸嚎哭：奶奶不記得我了
撰文：洪曉璇
出版：更新：
人生最痛苦，莫過於子欲養而親不在，大家每日營營役役之餘，有幾多時間陪喺家人身邊呢？小S徐熙娣喺幕前形象一向大情大性，但其實佢出名孝順，對老爺奶奶都相當好。呢日佢喺深夜忽然上載一段邊聽歌邊落淚嘅短片，原來佢同囡囡去探望嫲嫲，得知嫲嫲已經唔記得佢地，令佢相當難過，憶起過世已久嘅爸爸悲從中來，提醒粉絲：「好好愛你該愛的人！不要有遺憾！」
小S一向相當孝順，呢日帶埋囡囡同大家姐徐熙嫻一齊探望嫲嫲。(徐熙娣Facebook)
小S上載一段約4分鐘長嘅短片，一路聽陳奕迅嘅歌《好久不見》，一開始不發一言默默落淚，直到歌詞唱到「我會帶著笑臉，揮手寒暄，和你坐著聊聊天，我多麼想和你見一面，看看你最近改變」觸動佢嘅情緒開始嚎哭，原來係同日下晝去探望嫲嫲發覺對方已經失智忘記自己，令佢憶起過世多年嘅爸爸，小S隨後哽咽話：「爸，奶奶都不記得我們了，可是我知道她記得你，如果奶奶去找你的時候，她忘了你的話，要跟奶奶說：我很想妳，我們都很想妳！」
小S崩潰落淚，隔空對已過身嘅爸爸訴說心聲。(影片截圖)
唔少網友話見到小S嘅情況，諗起家中老人家身同感受，唔止係網友紛紛留言安慰，連小S媽媽都有親身留言：「好了！別哭了！我也沒爸爸，還是活這麽老，你還有娘耶，不喜歡你這樣」小S亦回應話：「你可千萬別忘了我。」並寄語網友：「雖然奶奶都不記得我們是誰了，但我們永遠記得奶奶，永遠愛着她～人生該如何過？好好愛你該愛的人！不要有遺憾！」
小S不時曬出同家人嘅合照，呢張係同老公許雅鈞、徐爸爸以及嫲嫲嘅舊照。(網上圖片)