【公開放閃】卓韻芝首曬與未婚夫合照 輕挑下巴：暫時只此一張
撰文：洪曉璇
出版：更新：
2月13日忽然傳出卓韻芝嘅婚訊，佢喺新書中低調公布：「我要結婚了，就跟你。」保證係佢嘅書迷率先得知喜訊，呢個方法認真唔錯。不過阿芝未婚夫到底係何方神聖，一直相當神秘，只知道佢地認識十幾年後重遇再拍拖，呢日終於有樣睇啦！
13號宣布婚訊，但原來2月14號情人節，卓韻芝先正式收到未婚夫參與設計嘅鑽戒。（卓韻芝Facebook）
阿芝呢日上載一張相，佢用手指輕挑起相中男士下巴，原來呢個就係佢神秘嘅未婚夫！阿芝留言話：「終於有張與未婚夫的合照！」仲加上Hashtag：「人人都影相唔通人人都影相咩；尋晚被媒人婆阿蚊影到相；尋晚被媒人婆阿蚊影到相。」仲Tag咗一個IG帳戶，咁咪可以起佢未婚夫底囉。
雖然只影到側面，但兩個人嘅眼神都好有愛呀。（卓韻芝IG）
撳到入去，原來呢個IG係電影《空手道》嘅美術指導張蚊所影，而張蚊又原來正正係阿芝同未婚夫之間嘅紅娘。張蚊留言話：「聽說，愛情是這樣的，不知不覺的，從我的生日認識的，原來是這樣的。」能夠牽線結下良緣，睇嚟到婚禮當日，阿芝都應該封返大利市俾張蚊先得啦。
多得張蚊，卓韻芝先可以遇上對的人，首張公開合照由張蚊操刀，都總算係理所當然啦。（卓韻芝IG）