許廷鏗唔講自己係咪鍾意女仔：唔使咁執着呢啲嘢

許廷鏗（Alfred）以代言人身份出席護膚品牌活動，提到日前白色情人節當天他與好友胡鴻鈞 （Hubert）「前後腳」於ig出post上載各自單獨置身雪地的靚相，不少網民即搞笑留言問他們是否互相為對方揸機拍攝，明明是單人相卻依然令人feel到有陣hehe味。問到Alfred該張靚相究竟是否Hubert為他操刀拍下，他表示：「呢次旅行係幾個朋友一齊去嘅，佢好遲都未firm到去唔去。啲人成日都講我哋㗎啦，連坤哥（吳業坤）都會拉埋一齊嚟講。其實坤哥今次都想join我哋，不過佢有事join唔到。」

Alfred坦言絕不會因為這類hehe傳聞而受到影響：「我唔會介意，亦都唔會避忌，不嬲都係成班朋友一齊玩，作為藝人好難放鬆，難得夾到時間去旅行真係好開心，下次都想再一齊去。我都慣咗畀人咁寫，我身邊啲朋友個個都寫過晒。」問到可會想趁機澄清一下，他勁大方咁話：「唔使再澄清啦。（話畀大家知你鍾意女仔？）唔使咁執着呢啲嘢嘅。」又啱呀，其實鍾意男定女又使咩咁執着呢，最緊要自己鍾意咪得囉。