【名廚爭鋒】謝霆鋒買餸被人圍 心急大嗌 ：唔好掂我啲蛋！
撰文：洪曉璇
出版：更新：
Chef Lemon對廚藝嘅執著，大家有目共睹。
女人要入得廚房出得廳堂，呢個想法已經Out咗啦。男士肯下廚煮得一手好菜式而依家更為吃香。「Chef Lemon」謝霆鋒近年醉心研究煮嘢食，佢嘅廚藝真係有目共睹。《名廚爭鋒》第二集中佢同加拿大名廚David Rocco去到順德拍攝，蒙眼試食後去街市買餸，點知一落車霆鋒即刻俾fans包圍，搞到佢要大嗌：「唔好呀！」
節目第二集Chef Lemon同加拿大名廚David Rocco去到順德拍攝。
第二集由順德當地名廚搵嚟一道地道菜「煎釀鯪魚」俾霆鋒同David蒙眼試食。試食完後，霆鋒同David就去街市買餸。一去到街市，霆鋒即刻俾fans包圍，「我一落車，已經有好多人駐足圍觀兼影相，亦即係話……好難買餸。」雖然有工作人員開路，不過都係迫到行唔郁，幾經辛苦買菜買魚買蒜買莞茜，最後霆鋒買咗盤蛋，為咗要好好保護啲蛋蛋，霆鋒笑住大叫：「唔好掂我啲蛋呀～」場面墟冚嘅程度，就連David都話：「真係好瘋狂！」不過David都唔係好得霆鋒好多，由於David 語言不通，想買嘅嘢都買唔到，好彩最後有位識英文嘅女生幫手翻譯，David先可以買齊材料。
去街市買餸撞到Chef Lemon，瘋狂影相是必須的。
比賽完結，三位評判都話霆鋒好功夫，「第一次嚟順德已經做足準備功夫，一道菜入面包含咗兩道順德最有代表性嘅菜：炒牛奶、炸魚皮，兩樣都係好考功夫。順德菜以鮮為主，霆鋒掌握得非常到位，稍為有少少不足係炸腐皮未夠脆。」最後霆鋒以24：23分，繼第一站後再次勝出。賽後霆鋒坦言順德係最難嘅一站，「鯪魚本身係好難處理嘅一件事，煎釀鯪魚就係要將整條魚拆肉、拆骨、起皮，皮唔可以穿，呢個要求係相對地麻煩。所以我道菜叫『鯪魚瑞士卷』，腐皮包住啲鯪魚肉，入面仲有塊紫菜，同埋炒咗個鮮奶墊底，咁啲炸咗嘅魚皮就可以塞番啲鮮奶。」
五集節目，Chef Lemon已經連勝兩集﹗
+1