古巨基紅館尾場搞鬼講傷勢： 大家都知我死唔去

古巨基今晚於紅館舉行《WE我們世界巡迴演唱會—香港站特別版》尾場，雖然日前發生墜窿意外，但基仔依家然落力演出，未有受傷患影響，在台上跑跳自如。來到尾場，現身支持的嘉賓可謂群星拱照，包括：張智霖與太太袁儀、林奕匡與太太、楊受成與太太、李克勤、森美、唐詩詠、小肥、泥鯭@RubberBand、溫碧霞、湯寶如等等。

演唱會以強勁的舞台效果揭開序幕，基仔以戰士乘坐戰機於半空出場唱出《爆了》，激昂的節拍，配合眩眼動畫迅速炒熱全場氣氛，之後唱出《夢中人》承接氣勢。之後基仔「降落」至台上與歌迷打招呼，他生鬼地提起日前發生的意外：「我要小心地離開個中間先！大家明唔明咩叫『見過鬼怕黑』呀？我見過隻鬼，都好大隻㗎，所以我依家都好怕！」

基仔續說：「大家睇過呢幾日我嘅報道，都知我嘅狀況⋯⋯」他突然大吉利是話：「都知我死唔去⋯⋯啋！亂講嘢，係不幸之中嘅大幸！」見台下歌迷反應強烈，基仔打圓場說：「我睇完醫生，佢話會有少少後遺症，手尾都幾長，佢話我唱歌會好聽咗，大家可以檢收一下，哈哈！講正經，其實依家肩頸嘅肌肉仲有啲緊，不過我都係講少啲嘢，等陣間有多啲時間可以唱多啲歌！」基仔以風趣的方式向歌迷交代傷勢後，唱出《必殺技》、《大雄》、《歡樂今宵》等金曲，將大家拉回歌曲的情緒之中。