謝霆鋒衣架掛意粉後又一力作　Chef LeMon車頭冚煎蛋成唔成功？

已經落實為內地爆紅歌唱節目、浙江衛視《中國新歌聲（前名：中國好聲音）》第三季擔任導師嘅謝霆鋒，噚日（5日）現身北京鳥巢為節目拍攝導師宣傳短片。雖然係回歸音樂，不過Chef LeMon都無忘記，身為Chef LeMon應有嘅態度，繼用砧板做mouse pad、用衣架掛意粉後又一力作 --- 車頭冚煎蛋﹗

宣傳片講述霆鋒揸住節目組嘅「試音大貨車」喺北京地標鳥巢兜圈，素人選手可以自由上車唱歌俾霆鋒聽，如果霆鋒覺得唱得好，就可以發直通卡，邀請對方參加現場錄影。話就話拍宣傳片，不過其實現場真係有素人走上貨車唱歌俾霆鋒聽，噚日香港一號風球又黃雨，北京就啱啱相反，曬到爆炸之餘，氣溫仲高達41度，不過霆鋒都好有耐性好認真咁聽晒所有素人選手唱，唔係因為拍宣傳片，拍完幾個鏡就算。

呢頭認真聽，轉個頭霆鋒突然「Chef LeMon」上身。高溫之下，本來着住紅色格仔衫嘅霆鋒都忍唔住要脫，太陽曬到地面同車都勁辣手，呢個時候，霆鋒行到車頭用手摸吓車頭冚個熱度，然後就露出一副好滿意嘅表情同工作人員講：「想要個雞蛋！」之後仲做咗個煎蛋嘅動作，即席喺引擎蓋上表演「鋒味煎蛋」，雖然只係扮煎，一樣睇到現場嘅人拍手大笑。