曉治積曼耗時四個月砌《星夜》 親手一秒摧毀1500塊砌圖
撰文:冼燕珊
出版:更新:
大家砌完超過1000塊嘅砌圖會點處理呢?狼人曉治積曼(Hugh Michael Jackman)最近用咗4個月時間,砌一幅 1500 塊嘅梵高《星夜》砌圖,佢仲喺 IG 開 life ,等大家見證住佢將最後一塊砌圖砌落去,但佢砌完無耐之後,竟然做咗一件令人非常震驚嘅事!
片中所見,Hugh Jackman 非常慎重地而且小心地將最後一片砌圖放上去,終於將成幅砌圖完成,佢用手推動幅砌圖,令幅畫上嘅星星都好似有生命咁閃爍起來,Hugh Jackman臉上一片欣賞之情,一邊摸住幅砌圖一邊話:「我用咗成4個月去砌好佢,」佢續說:「然後我用一秒拆散佢!」下一秒 Hugh Jackman 就瘋狂咁拆散晒成幅1500 塊嘅砌圖,嗰吓真係嚇死寶寶,嚇到心都離一離,真係重覆睇幾多次都係覺得好震撼。好多人都問點解唔送畀人?其實 Hugh Jackman 辛辛苦苦砌咗4個月,應該都係等拆散幅嘢嗰吓。
+2