【深宮計.專訪】張慧儀獨力照顧養子 愛情受挫不後悔:命運安排

撰文:
最後更新日期:
「冇嘢叫做後悔嘅,一切都係命運安排。」
張慧儀

張慧儀人生就如電影,拍過電視劇《真情》同時也拍過王晶的電影《強姦3OL誘惑》及《原始武器》成為「性感女神」、被未婚夫毆打及後孤身一人又到北京生活10年、收養患心臟病的養子、成為商人再重回電視圈。其實問到「你人生做過乜乜乜,後唔後悔?」99%的藝人也會慣例說:「我唔後悔,人生冇得返轉頭㗎。」這類說話。不過,張慧儀在過去20年的演藝圈生活,一定過得比大部份更曲折離奇。如果大家經歷過張慧儀一樣的人生,又能否可以像她一樣坦蕩蕩的說「冇嘢叫做後悔」呢?

張慧儀在《宮心計2深宮計》中飾演陸司製。(劇照)

張慧儀90年代可謂街知巷聞的影星之一,無論是其入屋的代表作《真情》中的「彩瑤」和「阿貴」、《西遊記》中的「大蜘蛛精詩詩」又或是現在播出的《宮心計2深宮計》的陸司製,都為她贏得不少掌聲。

不過在1999年張慧儀拍攝《真情》期間,就接拍了王晶的《強姦3OL誘惑》、《原始武器》2部電影,當時更讓人驚訝她竟會放棄電視上的正面形象。「我覺得作為演員應該可塑性高啲,除咗入屋之外,性感都係一個image嚟㗎,而且我嗰時後生,後生我仲有咁嘅條件,我應該去show畀人睇。嗰時我係有呢個心,我到宜家都唔後悔,宜家我諗返我自己,好在我後生嘅時候性感過。點解呢?因為我宜定咁嘅年齡我唔會做呢啲嘢,個心態都唔一樣,仲會覺得好核突添。」

張慧儀在90年代有「性感女神」之稱。(林順禎攝)

【深宮計.專訪】劉心悠不愛做女神:我長短腳大細眼唔Perfect!

【深宮計.專訪】張文慈自覺學做人難過學做戲:有啲嘢唔好咁認真

冇咩話後悔亦冇咩話遺憾,(霍紹裘)都係人生中出現過嘅一個人。
張慧儀

《宮心計2深宮計》中,張慧儀飾演的陸司製沒有感情生活,但原來現實中的她一樣是愛情失意。要講張慧儀最轟烈的一段愛情,就是她與未婚夫霍紹裘。

2003年正當所有人都以為張慧儀會與未婚夫霍紹裘「拉埋天窗」之際,卻因被未婚夫毆打受傷而感情亮起紅燈。談及當年,她也沒有後悔過:「每一個人喺生命中出現,一定有佢嘅理由,唔會係偶然嘅係咪?就算係,都係我自願想同佢一齊,就冇話後唔後悔嘅,既然佢曾經喺我生命中出現過,陪我行過一段路,無論嗰段路有幾長有短,都叫做一個經歷,既然大家唔行到尾嘅,咁亦都係我哋緣份淺,咪就係咁囉,冇咩話後悔亦冇咩話遺憾,(霍紹裘)都係人生中出現過嘅一個人。」

張慧儀與養子Hanson感情很好。(網上圖片)

隻身一人遠赴北京做生意

同年張慧儀亦遠離傷心地到北京,她形容北京之旅只是散心:「嗰時離開,冇諗過一去就係10年。我去到北京真係一個朋友都冇,我連住邊我都唔知。我去到北京諗住放個悠長假期,直至到我做生意,我帶住果醬遂間遂間經銷商去sell。人哋同你講no,但係唔緊要,我同自己講『唔緊要,北京咁大,我只要搵到一個就夠㗎啦。』後尾搵到個經銷商就咁去,生意好普通。但因生意普通,我有時間去做義工,就喺孤兒院遇到我個仔。」

張慧儀形容遇到Hanson都係天意。(林順禎攝)

【深宮計.專訪】康華嘆香港大陸拍劇分別大:國內係演員定規矩

【深宮計.專訪】黃心穎見慣娛圈明爭暗鬥:有咩事我都會出聲

一個正常都會反對,但係我唔知點解有咁大決心我一定要同佢一齊,呢個就係天意,天整定要畀我㗎。
張慧儀

因緣際遇之間,張慧儀又重回香港電視圈。(林順禎攝)

命運安排了張慧儀與Hanson的相遇,同時也似乎填補了她愛情上的空白,成為她人生之中最重要的人。「唔知呢,我覺得女性去到某一個年齡有一個隱藏嘅母愛,自己都唔發覺㗎。佢係滿足咗我呢一個母性,唔係佢,我都唔知自己有咁大嘅母愛。」每樣關於仔仔的事,張慧儀都特別上心,無論是學業、仔仔醫療上的照顧又或是飲食,她都盡量親力親為。「佢真係我一手湊大,佢食嘅每一餐都係我煮。佢返學我就6點鐘起身,煮好早餐同埋午餐畀佢帶埋返學,就算我以前拍《M-club》拍到半夜三更,我都係第二朝6點起身煮早餐畀佢,呢個已經係我生活一部分,我已經唔覺得辛苦。」

「我個仔成日都話:阿媽你係女中豪傑。我問阿仔你知唔知咩叫女中豪傑吖?佢話能幹嘅女人咪女中豪傑囉。」

就正如文章開頭寫到,張慧儀對人生完全沒有後悔2字,一切她遇過的事情,就如預先為她安排好一樣。或許她當初沒有接拍王晶的電影時,就沒有「性感女神」的稱號;或許她當初沒有選擇與未婚夫分開,她就不會隻身一人到北京;或許她沒北漂的話,就不會到孤兒院,更不用說會遇上患有心臟病,嘴唇發紫的2歲小孩,再成為她的養子Hanson。或許張慧儀這個「不後悔」的人生中的一切,就是引導她到養子Hanson的身邊,或許Hanson就是她人生中的答案。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。