49歲袁文傑自認保養得宜 向男士傳授秘訣：屋企有湯記得飲
撰文：賴家杰
出版：更新：
袁文傑（Andrew）今日（31日）出席品牌活動，活動中亦有問到平時保養心得，接受《香港01》訪問時，Andrew提提大家，唔單是女性要保養，男士一樣要。不過問到Andrew覺得自己呢個年紀算唔算保養得好好？Andrew聽到嘅時候都忍唔住激動大聲笑足五秒咁多，「我覺得以我呢一個年紀算係Ok啦，仲有一樣頭先唔記得講，如果屋企人煲湯最好抽時間返屋企，飲你媽媽或爸爸煲嘅湯水，唔好話唔得閒，尤其是我哋香港人，其實湯水好重要，我小時候我媽媽一個星期7日煮飯有6晚都會煲湯，可能飲湯水飲得多都會打好底子，講到咁又好似變以老賣老添，年輕嘅朋友，如果屋企有煲湯記得唔好唔飲。」聽到呢到，各位朋友真係想保養得更好嘅話，嘗試下Andrew嘅做法。
袁文傑（Andrew）出席品牌活動，現場更分享不老秘訣。（葉志明）
Andrew高大嘅外表，男人味亦俱備，被稱為男神絕對唔會失禮，但Andrew覺得男神呢一點係外界品評：「我冇理由話自己係男神㗎嘛」講返工作方面，Andrew其實一直劇接劇未有停過，他透露至少有五套劇喺手，但咁忙碌嘅佢早前亦抽空同當年紅極一時嘅童星「小柏林」食飯，Andrew表示食飯是必須的：「剛剛好抽到時間，我並唔係經常聯絡佢本人，我聯絡佢媽媽多，睇住佢成長，想一想佢嘅江湖地位好高，至於點解會有呢一餐飯岀現，原因係佢媽媽生日。」
袁文傑早前同童星「小柏林」食飯。（葉志明）
小朋友長大過程好奇妙，傳媒都關心Andrew會幾時生小朋友呢？Andrew直言生小朋友係另一個課題，「關於呢方面我覺得小朋友係好天真好可愛，但如果係自己嘅就有責任栽培佢，我覺得自己都仲係....我自己都未太穩定，所以暫時唔打算去想呢一件事。」
袁文傑被問到生小朋友計劃，佢表示暫時未有計劃。（葉志明攝）