鄭伊健同老婆激罕「同場」 蒙嘉慧速遞湯水支持老公個唱
撰文：冼燕珊
出版：更新：
鄭伊健將於明年2月舉行個人演唱會，12月11日公開發售。早前伊健現身TVB台慶，擔任表演嘉賓試試水溫，粉絲反應非常熱烈，今日（7日）舉行演唱會記者會，一班圈中好友，陳奕迅、鄭秀文、周杰倫同黃金兄弟檔拍片支持，仲有近30名歌迷會成員一齊上台支持偶像，仲親手整立體心意卡畀伊健，場面非常温馨。
伊健著皮褸出場，真係好鬼型。（陳順禎攝）
唔只粉絲，仲有另一位重量級嘉賓——老婆蒙嘉慧拍片同老公打氣，承諾伊健開演唱會期間做好老婆嘅角色，唔煩住老公之餘，仲「湯水繼續有」，仲現場速遞湯水畀伊健，兩公婆激罕公開隔空互動。
蒙嘉慧激罕高調以「鄭太」身份示人，仲公開叫伊健做「老公」。（陳順禎攝）
伊健接受訪問時，大讚老婆係煲湯專家，「呢個係佢嘅責任，佢成日話如果我有咩事，大家就會怪佢。佢依家對煲湯好有研究，邊啲食得唔食得，連啲朋友都向佢指教。好簡單嘅湯，但好好飲，我已經慣咗飲佢嘅湯，出街飲湯覺得好多味精。」對於老婆拍片同自己打氣，伊健話非常驚喜：「無諗過佢會肯拍，平時我哋好少一齊出現，多謝佢。」
伊健大讚老婆係煲湯好掂。（陳順禎攝）