毛舜筠藍帶畢業後首開自家製曲奇店 為搞包裝同老公鬧晒交！
撰文：秦志鴻
出版：更新：
舊年法國藍帶畢業後，毛舜筠（毛姐）一直致力研發自家曲奇，最近終於都正投身飲食界，在港開設曲奇餅店，開張當日，毛姐媽咪、家姐、細佬一早到場支持，老公區丁平更落手落腳幫餅店做佈置！
看姐的細佬（左）、媽咪（右二）及家姐（右）。
毛姐在正式開業前一晚，為整理產品做到凌晨一點：「間舖入面每一盒餅嘅絲帶都係我綁，噚日就加埋我大女一齊綁，每綁一條絲帶，就好似一個祝福，覺得唔係淨係俾咗一啲食物人哋，仲加咗一啲心意同埋祝福喺裏面。」走的時候看到望到燈箱有自己張相，更百感交集：「突然間覺得：『我啲餅面世啦！作為一個廚師，有嘢俾人食啦！』嗰種感覺好特別！好感動，望到自己個BB出世啦！因為全部嘢係我一手一腳，通常人哋做餅，或者我哋嗌人做，都係一個代言人，但我唔係，由每一塊餅，到呢間舖。」
開幕前，毛姐在廚房準備曲奇及飲品。
今次毛姐開鋪，老公區丁平亦有出手幫助，但卻因此而發生不少拗撬：「譬如曲奇嘅包裝又或者舖頭嘅設計，其實我已經覺得好好，但佢係美指，佢永遠都覺得可以再好啲，哈哈。但如果要再做過，就趕唔切開舖，係dealine，佢最憎就係聽到『deadline』呢個字。所以我會𠱁佢，話而家已經好好，我哋開咗舖先，我會keep住有餅出，到時佢就再可以有新嘅design出嚟，呢招通常都過到骨，哈哈哈。」
毛姐親力親為，拎餅俾客人試食。
毛姐話除了兩個女，今次是她與美術指導老公區丁平多年來，第二次合作所生的「結晶品」：「今朝返嚟，見到我老公，將每一棵植物擺喺唔同位置嗰種心思，由裝曲奇嘅木盆、玻璃蓋，舖入面每一樣都係佢買，成間舖係佢設計，我係覺得有好多愛喺裏面，就算期間我哋有幾多拗撬都好，都係覺得老公係犀利嘅！」
毛姐媽咪（左）及家姐（右二）一早到時支持，兼成為舖頭第一名顧客。
英皇集團主席楊受成博士送上花藍祝賀。