【專訪】嘆息香港搞音樂節困難重重 何超儀:澳門可能仲好!

撰文:
最後更新日期:

何超儀組成樂隊Josie & The Uni Boys近十年, 每年也會參與大大小小的音樂節,就連Wow and flutter也曾邀請他們作嘉賓。近年他們更自行大搞音樂會,就如去年的《We Go Berzerka Explode into life》,以及即將於4月6日舉行的《The Classic Purple Psycho Experience》。每一次的音樂會也充滿實驗性,革命似的把不同元素放進搖滾的主軸內。

Josie & The Uni Boys將於4月6日舉行《The Classic Purple Psycho Experience》。 (資料圖片)

向Massive Attack睇齊 大玩AI視覺實驗

去年與視覺導演John Wong首次合作,何超近乎有種上癮的執迷:「當時我完騷已經即刻拉住導演同佢講,不如再合作多次。」順理成章,跨界創意人John Wong便再度成為今次《The Classic Purple Psycho Experience》的視覺導演。

提起今次音樂會的其中一大賣點,二人皆表示:「其實今次唔止係一個音樂會,更加係視覺同聽覺嘅共同體驗,我哋好重視體驗方面,所以今次亦用咗一種較新嘅技術。」他們口中的技術名叫GAN (Generative Adversarial Network),由人工智能生成多幅疑幻似真的視覺藝術作品:「我哋將上萬張有關香港景觀嘅相片畀個AI學習,之後佢哋就可以根據學習返嚟嘅訊息,生成唔同嘅藝術作品。」

這個技術其實大有來頭,去年就有一個藝術拍賣會,把法國一個藝術團體用GAN技術生成的畫作,以三百多萬的價格成功拍賣。而今年Massive Attack的演唱會亦是用同類型的人工智能去製作影像,甚至連時裝界的攝影大師Nick Knight亦有用這種技術去重新生產一批影像。John Wong表示:「證明我哋已經進入咗人類同電腦共同創作嘅時代,今次係香港第一次用GAN技術創作視覺效果,我想令大家知道,外國做到嘅嘢,香港人都得。」

今次《The Classic Purple Psycho Experience》將與國際不少作品睇齊,包括Massive Attack舉行的演唱會,也用上同樣的GAN技術。 (資料圖片)

點擊大圖觀看更多以GAN技術生成嘅藝術作品
+8
+7
+6

何超透露,貢寮音樂祭與張北音樂節對Josie & The Uni Boys影響甚深。

最難忘張北音樂節 何超儀:越混亂越正!

話題回歸音樂,對於Josie & The Uni Boys,何超儀用簡單一句說話概括:「凡係有得去音樂節,我哋隊band嘅夢就可以發落去。」看似輕鬆的一句說話,卻盛載著滿滿的期望,真正讓何超儀啟蒙並愛上音樂節的經驗,要從台灣的貢寮音樂祭開始說起。

每年台灣的貢寮也會舉行最大型的貢寮音樂祭,邀請知名搖滾隊伍之餘,亦會發掘不少地下音樂單位。何超憶述:「我們第一次去台灣嘅貢寮音樂祭,音樂節嘅地點喺沙灘,旁邊圍住一啲矮山。當我哋架車上到山坡,經理人就叫我哋落車睇下個環境係點。當時正進行第一晚演出,然後一睇,成個沙灘都係人。全部人都郁緊,佈滿成個島。經理人話,聽晚我哋就喺呢度演出,我一聽到就嘩咗出聲。」

除了貢寮音樂祭,張北草原音樂節亦令她非常難忘。何超又道:「去張北音樂節,我哋架車由北京機場出發足足塞咗八個鐘,因為地點喺內蒙。我們心諗做咩事呢,個司機同我哋講,每年張北音樂節一舉行,由北京機場去張北嗰條高速公路必定會塞一星期,郁都唔郁。有人會喺路中心推車賣烤包,因為知道車龍不會郁,而大家都要食嘢。當我哋到埗後,就開始見到有十幾萬人從會場方向湧出嚟,有啲人喺草地行,有啲知道車龍唔郁就行馬路,敲車門問我哋可唔可以上車取暖。你會感受到嗰種混亂,好正,而香港唔會出現呢種混亂。」

作為音樂人,不經不覺組隊十年,何超亦覺得香港未必是搞音樂節的最好地點。

香港係搞音樂節嘅好場地? 何超儀:澳門可能仲好

提到林林總總的音樂節,何超也不禁嘆謂:「香港未必係最理想嘅地方。可以嘗試向政府申請,好似Clockenflap嗰類都做得井井有條,但係我哋呢類視覺加聽覺嘅體驗,最好都唔好太複雜,喺室內搞就比較理想。」皆因視覺導演John Wong心目中的效果,在器材上也較大需求:「戶外搞呢類型嘅騷,基建要具備多啲條件。對香港嚟講,技術上可以做得到,但係問題出於喺市場上,預算再提高嘅時候,係咪有咁大嘅空間畀我哋發揮而且回本呢?因為所有場地器材都要重新搭建。」

何超反建議:「反而澳門可以做得到,每間賭場都興建咗好厲害嘅劇院,本身已經具備三面全世界最大型嘅LED顯示屏,由地面到天花,好似一幅牆,仲可以移動。澳門擁有好多大型表演場地,容納到三、四萬人,比香港嘅場地更加好。」

《The Classic Purple Psycho Experience》門票火速售罄,現加推少量$280門票,樂迷們撲飛要趁早!



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。