謝霆鋒拉出17呎「長壽麵」 笑認下廚冧王菲:食過我煮嘅嘢

撰文:
最後更新日期:

「入得廚房出得廳堂」唔止係好女友標準,如果男士煮得一手好菜式就更加吸引﹗謝霆鋒近年致力發展其飲食事業,呢日宣佈其品牌正式登陸台灣﹗霆鋒喺記者會上即席露兩手,拉出17呎嘅「長壽麵」,令現場記者大開眼界,仲因為拉得太長要即場求救:「有沒有朋友可以來幫我一下?」最終直接將麵條當成剪綵道具剪斷。

謝霆鋒親自示範拉麵團用力到有啲氣喘,他搞笑說:「我就說如果有在做麵,根本不用去健身。」(官方提供圖片)

霆鋒一邊「拉麵」一邊同大家分享入廚對佢嘅意義同改變,佢話細個嘅時候同父母好少交流,七、八年前開始做《鋒味》先同父母拉近距離、修補關係,「有時我會問佢哋呢個好唔好食?駛唔駛加啲調味?我爸爸會問我:『你點可以每餐都煮唔同嘅嘢?』而且我用嘅食材都係天然,打開雪櫃有乜就煮乜,屋企人嘅評價都ok。」

專注嘅男人係最有型,霆鋒灑麵粉都一絲不苟。(官方相片提供)

問到佢成日煮嘢俾屋企人食,女友王菲有冇試過佢手勢?霆鋒就笑住話:「當然有,我所有嘅朋友都食過我煮嘅嘢。」咁有乜嘢comment?霆鋒就話:「呢啲唔講啦。」佢表示創立自己嘅飲食品牌,都係希望第時小朋友長大後,唔單止知道食漢堡包、炸雞等西式食物,希望透過自己嘅力量,令中式美食遍地開花。

現場邀請粉絲上台,盲試港式同台式奶茶有咩分別。(官方相片提供)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。