【武漢肺炎】可嵐「疫」境開食店親力親為：打和已經當贏！

香港唔少店舖因為今次武漢肺炎生意大受影響，日日蝕錢甚至倒閉，但亦有人選擇喺呢個時候創業做生意，可嵐就係其中一位，佢嘅食店正在試業階段。

可嵐接受香港開電視《娛樂頭條E-news Headline》主播馬梓軒訪問，表示正努力於「疫」境求生：「對我嚟講喺呢個疫情下經營，打和已經當贏！最緊要確保員工有份工，有收入！現時我將員工嘅工時縮短咗，同時將餸菜改以真空包裝出售，咁會比較衛生！」

可嵐透露近期不斷四出蒐羅消毒用品：「我自己買咗啲消毒搓手液放喺舖頭，都幾難買！我原本有200枝貨，點知疫情出現，得番20枝畀我！」對一罩難求可嵐亦感到相當無奈：「原本我以為屋企得一盒口罩，點知工人執執吓嘢發現多一盒，感覺開心過執到金！我成日覺得口罩就好似條命咁，有命先出得街！」