楊千嬅南灣千呎豪宅轉讓老公丁子高　「甩名」復首置資格再入市？

唔少香港人信奉有錢就要買磚頭，圈中都有好多藝人將血汗錢選擇置業作投資保值。楊千嬅過去都有投資物業，最近發現佢將同老公丁子高共同持有嘅鴨脷洲南灣單位，以低過市價轉讓予老公「甩名」，即時恢復首置身份疑方便再置業。

鴨脷洲南灣2011年入伙，係南區其中一個臨海豪宅屋苑，由9幢住宅組成。以流線型帆船設計依山臨海而建，半數以上單位可享深灣遊艇會至南朗山一帶近海以遠山景致。據土地註冊處資料顯示，楊千嬅丁子高2015年5月份透過聯名形式以1,882萬元購入南灣低層A室，實用面積1,056平方呎單位，近日以1800萬內部轉讓畀男方，較購入價低82萬，亦比網上估價低近2成，疑借「甩名」，令手上不再持有任何物業，重新獲得首次置業身份，再入市時可大大減低稅項。