MIRROR演唱會安排惹負評 陳志雲撐鏡粉批管理團隊︰唔好賺得太盡
人氣組合MIRROR將於7月底至8月舉行首個紅館演唱會，贊助商抽飛，以至日前於Urbtix城市售票網公開發售，玩足11小時大批鏡粉無功而還。而有35.5萬位成員的「我老婆嫁左比Mirror導致婚姻破裂關注組」，版主早前亦宣布將會永久關閉群組並怒轟：「當鏡粉係ATM係水魚，錢係要賺，但食相唔係咁難睇啩。」後來版主亦有回應部分網民對他「搲飛」等的指控，但似乎亦無意收回關閉群組的決定。而一向關心MIRROR發展的陳志雲亦有在YouTube的個人頻道評論事件，甚至力斥MIRROR的團隊管理的多方面不足，希望他們明白「粉絲們嘅付出唔係理所當然嘅」！
陳志雲留意到「我老婆嫁左比Mirror導致婚姻破裂關注組」的版主宣布要關閉群組，他指大部分成員都表示支持和有共鳴。有鏡粉提到要幫保險公司買高端保險plan才有機會得到演唱會門票，又或者要在電訊商的寬頻網絡升級計劃 upgrade plan先會送飛。不過陳志雲明言電訊商的抽獎「都唔知算唔算一份獎品」，因為1200位得獎者須於指定時間選購指定服務計劃，才得到相應演唱會的門票，他說︰「所以正確啲嚟講，呢兩張門票唔係啲乜嘢獎品，而只係一個機會，得到呢個機會嘅人，隨時就要花費差唔多萬5蚊，再買多300GB先至可以得到張飛。」他亦表示聞說要一次過付所有相關費用，以上種種，「難免有啲消費者可能會覺得受委屈」。
而官方歌迷會的抽籤認購，名額亦太少，陳志雲引述網民留言說︰「貴公司可唔可以對真鏡粉好啲？口講打擊黃牛，又唔放啲飛畀粉絲，會費就袋咗2000幾萬！」另外，亦有粉絲集資2、3000萬，自行做贊助單位令MakerVille加場。對於有關事件，陳志雲亦有意見，覺得管理MIRROR的團隊應該思考及反省，他說︰「MIRROR嘅粉絲都係好理智，大家都知道唔應該遷怒於MIRROR，因為佢哋只係演出者，呢啲一切嘅安排都冇得俾佢哋作主，管理MIRROR嘅團隊可能真係要好好哋思考一下，點樣去處理MIRROR粉絲嘅期望，啲粉絲作出嘅控訴唔係完全冇理由。有人話喺娛樂圈係食八方飯，唔理你有幾高嘅技藝，如果你得唔到觀眾嘅欣賞同埋支持，都冇辦法得到成就。」
陳志雲指出鏡粉出錢出力做盡一切宣傳和應援，幫偶像走上事業的高峰，「希望管理MIRROR團隊嘅人明白，啲粉絲們嘅付出唔係理所當然嘅，Do not take it for granted，至於現時出現嘅追星現象係咪健康呢，我暫且就唔評論住。」他最後強調，希望團隊認真處理今次的事，「想帶出嘅訊息主要就係管理MIRROR嘅團隊，應該係留意一下同埋認真處理而家嘅反響。喺商業社會，錢就梗係要賺，但係最好就唔好賺得太盡，如果唔係就會畀人一種唔係咁舒服，甚至係不良嘅感覺同埋印象。」