黎諾懿撈過界做監製 預告新節目下年面世：籌備緊
撰文：吳子生
出版：更新：
黎諾懿今日（8/12）現身打鼓嶺出席開幕禮。提到有份角逐台慶「最佳男主持」及「最受歡迎電視拍檔」，黎諾懿直言勝算不大：「其實我都係返去趁吓熱鬧，話晒都十幾年嚟都係陪跑，其實有得參與已經好開心，又可以戥得獎嘅同事開心，其實都幾過癮㗎。相反而家嘅我都開始轉型做幕後，如果能夠有朝一日我可以攞監製嘅獎項我反而開心啲。」
黎諾懿續說：「識我嘅朋友都知道，當我喺某個範疇做啲嘢係Ok嘅時候，我就會選擇去做其他嘢，就好似以前我跳舞叻攞咗獎，我又會唔跳。煮餸煮得好，我又開始煮少咗，喺呢兩三年，我起碼煮過千樣嘅餸，真係煮到有時冇靈感，既然大家都知我識煮就已經夠，變咗而家我喺籌備緊一啲自己監製嘅節目，預期會喺下年會面世，遲吓我就會向大家宣佈。」