香香婚後勁甜蜜 女神變人妻強嫂真開心：連奶奶都叫我強嫂
撰文：郭敏玲
出版：更新：
香香真係好cute。（郭敏玲攝）
仙氣女神岑麗香自從成為人妻後，叫一眾宅男呼天搶地的，就是「新娘結婚了，新郎不是我」。眼見喜歡的女神被他人佔有，心除了隱隱作痛，還會嫉妒香香老公強強，越是心痛，腦海越不受控地想：「有香香做老婆一日究竟點樣過？」夠啦！瞓醒啦！唔係你嘅始終都唔係你。
人妻香香今日就拍攝《溏心風暴3》的會議場面，鬼妹仔的她，能夠一氣呵成講出繁複對白，個個演員都為她拍手掌。眼見她充滿成功感的Sweet爆笑容，就算唔係男人，都會因此被溶化。Roll完機，能夠帶香香成功抽離，返回現實的人，就一定是老公強強。提起老公，香香就進入「少女mode」，甜笑帶幾分害羞。成為人妻之後，香香都被人「強嫂前、強嫂後」，她表示已經叫到慣晒：「Even係我奶奶，唔知點解佢都會叫我做強嫂，真係好搞笑。」說罷，香香又再甜笑，完全感受到她婚後生活多麼快樂。
香香做了人妻之後，依然容光煥發！（郭敏玲攝）
咁有香香做老婆，日常生活又點過？香香搞笑地話：「因為拍緊戲，所以有時候都會搵佢對下戲，幫我睇下啲表情做得夠唔夠自然。」雖然強強都喺外國長大，有好多中文對白都聽不明白，但能夠做香香的對戲的對象，一定好幸福啦，如果香香對嘅係親密戲，相信可以促進夫妻關係！強強為了促進彼此交流，特意買作業學寫中文字。為老婆學中文，這招真係幾冧。
見老公咁抵錫，香香都有為對方著想。現在她忙於開工，都不忍心強強做人肉鬧鐘叫起身：「我又唔想囉，雖然佢想。有好多時候開工都開07（7點），真係太早啦，之後又收好夜。如果叫醒我，呢個唔係一個好健康嘅瞓覺方法，所以個鬧鐘一響，我都會好快熄咗佢，自己走出廳化妝。做呢行啲時間都唔係好健康，我都想佢健康啲。」香香咁錫老公，真係令人羨慕。講到生活最重要環節，新婚夫婦應該努力做緊人？香香笑言：「現階段又未諗住喎！我同佢都想享受多啲二人世界先！到適當嘅時候再決定啦！」
+5