【母親節】吳肇軒胡子彤朱鑑然齊齊唱《真的愛你》　搞笑氹媽咪

並非一定要母親節先要念親恩，不過應節盡吓孝，又氹到媽媽，何樂而不為？胡子彤、朱鑑然和吳肇軒三個同門師兄分就非常識做，齊齊拍片向媽媽深情表白，兼夾送上一首冧盡天下媽媽心的《真的愛你》，點知吳肇軒愈唱愈投入，唔止唱到頭髮亂了，連音都走埋，變成爆笑片段，不過博到媽媽一笑，抵啦！

胡子彤由運動員變演員，今年還憑《點五步》勇奪金像獎最佳新演員，他認真地表示多謝媽媽25年照顧得他非常好，即使不停撞板，媽媽都一直支持。胡子彤還邀請媽媽重現童年照2017版，原來他的演技是遺傳自胡媽媽，二人一來就超級入戲兼七情上面，胡子彤還笑言懷疑阿媽比他更好戲。

一向無時停的吳肇軒開頭都尚算冷靜，情深款款地說媽媽經常擔心他闖禍，自言會好努力，不過正經極都只得五秒貨仔，因為他下一句就是：「其實唔使擔心，因為我係好叻嘅！」之後開始對着貌似媽媽的公仔唱歌，手舞足蹈跳晒舞，相信她看到都好難唔爆笑，吳肇軒仲自信地表示平日都是這樣，媽媽一定會包容他的瘋狂，非常搞笑。結果最後只得朱鑑然一個最認真，不過片尾三個都正正經經輪流講聲「媽媽，我愛你！」咁識do，媽媽想話唔冧都唔得啦。