【賭城群英會】港姐「圍城」阿佘演技贏晒　學歷幫唔到麥明詩拍劇

《香港小姐2017競選》前日剛剛完成首輪面試，當中131個參賽者各有特色，有畀人話似整過容、有未選中已經可以去「慧妍雅集」玩、有上屆友誼小姐個妹，亦有外援鬼妹Model加入戰場，真係唔知鹿死誰手！每年香港小姐選舉都係一大盛事，除咗有機會畀大家一次過欣賞一大班靚女之外，仲係TVB為女新人搵新血，唔講唔覺，其實好多女演員都係參加港姐出身。

就好似啱啱星期一首播嘅《賭城群英會》咁，雖然骨幹演員畀人笑加埋都成幾百歲，應該叫做《賭城耆英會》，但其實入面啲女演員都好有睇頭，點解咁講？原來入面主要四個女主角，佘詩曼、陳法蓉、文凱玲、高海寧都係港姐出身，就連配角都有十優港姐麥明詩，可以算得上係星級陣容。

由1989年陳法蓉大熱贏得冠軍、佘詩曼97年拎港姐季軍、高海寧08年拎香港小姐旅遊大使獎、文凱玲10年排港姐第八名，到前年麥明詩大熱奪冠同TVB簽約。其實想入行做娛樂圈，報名參加TVB香港小姐係不二之選，當然最緊要你本身係美貌與智慧都要並重啦，如果唔係參加完又陪跑就好浪費時間。陳法蓉同麥明詩兩個人同樣係冠軍，兩個人差成26年，幾乎可以話陳法蓉生得麥明詩出嚟咁滯，但睇落個樣其實又唔似差好遠。

港姐嚟講阿佘可以算得上係表表者，點解咁講？雖然佢唔係坐正冠軍，但遠比當年冠軍翁嘉穗更搶眼，就連上幾屆冠軍嘅李珊珊、楊婉儀、譚小環都唔夠佢嚟，當年阿佘初初出道已經做女主角，第二年拍《十月初五的月光》令佢一炮而紅，連續拎咗好多個獎，除咗因為佢腳頭好，出道接拍嘅全部都係好劇本，好似係《十月初五的月光》、《酒是故鄉醇》、《歲月風雲》、《絕代商驕》、《宮心計》等等，套套都係當年嘅收視冠軍。仲要因為阿佘係天生嘅演員，無論佢做鄰家女孩嘅祝君好、攻心計嘅爾淳小主、阿甘精神嘅劉三好，抑或係有情有義嘅釘姐，全部都入型入格，演技嚟講可以話係爐火純青，所以近年佢可以話畀大家放咗上神枱。

阿佘係戲入面同高海寧同文凱玲做同門師姐妹，睇落就好似三姐妹咁！

唔講大家都未必記得其實陳法蓉係89年港姐冠軍，當年出道之後即刻拍電影《賭俠》，裡面做悍警龍九，令觀眾對佢眼前一亮，之後佢都有斷斷續續拍咗好多電影。而拍劇方面，佢產量唔算高，平均一年拍得一套劇，所以大家對佢嘅電視印象未必好深，最令大家印象深刻嘅肯定係同張衛健一齊拍嘅《小寶與康熙》，佢一人分飾兩角做龍兒同太后，霸道得嚟又好溫柔，呢個角色令觀眾又愛又恨，但拍完呢套劇之後佢就冇再拍劇，專心搞慧妍雅集做會長。眨吓眼就十六年，今次陳法蓉再次返嚟TVB拍劇做第二女主角，唔知嚟緊會唔會仲會參與拍攝其他劇呢。

陳法蓉真係好似食咗防腐劑咁！

喺劇入面最吸睛嘅一定係高海寧，前日高Ling女僕裝一出街，即刻全部討論區都瘋傳佢嘅劇照，瞬間成為網絡熱話。雖然佢身材好標青，但絕對係有美貌又有智慧，原來佢會考有成22分。08年參選港姐雖然就入唔到三甲，但之後簽約TVB之後參演多套劇集，縱然唔係擔正做女一，但漸漸入屋令觀眾對佢印象深刻，大家出街見到佢都識叫高Ling，可以算係「發展中」的女藝人。

而近年嚟講麥明詩係被TVB重點栽培嘅港姐冠軍，佢「10A」加上劍橋大學畢業嘅背景，令佢成為知性女性嘅代表，更因為佢讀法律系，喺香港社會敏感性話題中，作出理性而又有引述法律理據批判性評論，被大家大讚係「最貼地嘅港姐」，佢敢言嘅性格亦令TVB畀多好多主持嘅Job畀佢做，好似上年《里約奧運》，就連最近TVB重點發展嘅手機App「Big Big Channel」都以麥明詩教小朋友做功課嚟Sell客，所以麥明詩絕對係近幾年港姐嘅黑馬！

如果拎阿佘同麥明詩比較就有啲唔公平，因為一個係行演技拍劇，一個係口才做主持，就好似拎Do姐（鄭裕玲）同家燕姐（薛家燕）比較咁，係冇得比嘅！兩個人同樣都係TVB睇重嘅人，大台睇得起你，星途都唔會差得去邊，好似蔡思貝畀人話演技差都拍咗十套劇，有七套係做女一，所以麥明詩，我睇好你！