網劇《無法擁抱的你》顏值取勝 邢昭林化身高冷男
撰文:鄺鈺瑩
出版:更新:
大陸近年興起一片網劇熱潮,而單係今個月,就同時有4部上檔,當中包括以校園和懸疑推理為題材嘅《推理筆記》、被稱為中國版《惡作劇之吻》嘅《致我們單純的小美好》、穿越遊戲世界嘅《拜見宮主大人》,不過,最多網民表示期待嘅,係《無法擁抱的你》。《致我們單純的小美好》主力賣純,加上女主角沈月將出演中國版《流星花園》杉菜一角,雖然為劇集大大加溫,但一講到顏值,《無》即時跑贏幾條街。
該劇男主角邢昭林之前所參演的《雙世寵妃》點擊率高達41億,劇中他飾演霸道王爺,同女主角有不少甜蜜互動,令女粉絲睇得十分肉緊。而邢昭林完成《雙》後,馬上投入《無法擁抱的你》拍攝,劇中他所飾演的姜志浩有嚴重潔癖,唔喜歡同生物接觸,直到遇上神祕女子,被對方主動追求,繼而發展一段愛情故事。
喺較早前公開嘅預告當中,只見女主角張予曦為將邢昭林追到手,不惜使出壁咚、撫摸等招數,不過就係感情有進展時,同張予曦青梅竹馬嘅萬人迷戴景耀亦宣告加入戰團。二男加一女,到底最後會發展成點,真係要拭目以待。