吳岱融開腔原來係磁性靚聲　「鷲哥」年底仲會出多首江湖歌

鷲哥吳岱融演技好就眾所周知，其實他唔止演得，唱歌都一樣好好聽，之前他就錄了一首國語歌《回去愛你十億秒》送給太太鍾淑慧來紀念兩人結婚22周年，呢首歌的MV更是由兩人的仔仔操刀剪接。不過首歌預計於明年情人節兼兩人的結婚紀念日先會在網上推出，所以大家只可以聽到花絮的兩句，未能夠聽真吳岱融把靚聲。咁唔通要等到出年等到頸都長？

日前網上就有一個由吳岱融與歐瑞強合唱的廣東歌《水霞‧風雲》的MV，其實呢首歌他們於今年初在一個慈善節目上已經唱過。今次這個MV重新編曲給他們再度合唱，兩人把聲夾到不得了，好有火花之餘仲好好聽，無論曲風同歌詞都好優美又充滿意境，而吳岱融除了有唱功，把聲更加係極磁性，絕對係靚聲王。MV入面仲加埋他於網劇《反黑》飾演韓彬的一些片段，令人聽得份外投入和有感覺，網民亦紛紛留言大讚。

可能大家未必知道又或者是已經唔記得吳岱融於1992年曾經出過一隻國語專輯「緣迥」，咁他還會否再考慮出碟呢？香港01記者就致電訪問了他，他說：「應該唔會再出碟喇，不過嚟緊就有幾首歌會推出，同啲朋友喺網上打歌，一齊玩下過下癮咁囉。其中一首就係之前唱畀太太嗰首《回到愛你十億秒》，另一首就會喺今年底推出嘅，講江湖男人嘅心態，好似我演過嘅高天鷲同韓彬嗰啲人物。今次呢個MV我好多謝我哋老闆Vincent同埋編歌嘅Johnny Yim，當然仲有Albert Au (歐瑞強) 同《反黑》嗰邊啦。」

唱歌唱得咁好聽，其實他有沒有學過唱歌呢？他謙虛地表示：「唱歌就OK啦，我自己覺得就唔係好好聽咋，咁我自己都鍾意唱嘅，當時我出道嘅時候都曾經喺新加坡啲Lounge度做業餘歌手。(有無咩首本名曲？) 可能覺得出嚟個效果幾好嘅，就係費玉清嘅《一剪梅》啦。」又到聖誕新年農曆年這些出騷搵真銀的日子，以往都有登台的他暫時就無機會上台止下歌癮了：「今年拍緊戲拍緊劇所以忙到無接到其他Job囉。」至於他的唱歌出騷價，他透露：「都有6位數字嘅，一般係唱兩至三首歌，但亦都會有啲special request我一個人當演唱會咁嘅，有唔同嘅situation，當演唱會咁當然會收貴啲啦。但如果係為慈善演出就唔會收錢。」