【有片】五月天元旦日開騷送大禮 邀林俊傑到場組「六月天」
撰文：洪曉璇
出版：更新：
五月天一連11場桃園跨年演唱會，吸引24萬人次到場朝聖。(五月天Facebook)
2018年剛剛先開始，香港同台灣嘅樂迷都收到大禮，如果謝霆鋒陳奕迅回到叱咤嘅舞台係集體回憶，咁五月天同林俊傑同台合唱應該係台灣歌迷嘅新年大禮。五月天元旦日喺台灣桃園嘅演唱會，請來金曲歌王JJ林俊傑到場合唱《黑暗騎士》，佢地喺音樂上曾經兩度合作，但同台表演都係第一次，難怪JJ興奮地話：「好high呀！大家好，我們是六月天。」
音樂上兩度合作，估唔到出道多年來，JJ同五月天呢日先首度同台表演。(五月天Facebook)
五月天自12月23日起喺桃園舉行跨年演唱會，1月1日為歌迷送上大禮，唱到《黑暗騎士》時， JJ突然現身同阿信對唱，引來全場尖叫。08年JJ曾邀請阿信為自己寫詞，到13年阿信搵埋五月天團員一齊無酬跨刀，催生JJ新歌《黑暗騎士》。直到2017年的KKBOX林俊傑也僅和獨缺阿信的五月天同台，而元日演出終於令JJ同五月天首度同台獻唱。JJ興奮地說：「好high呀！開心終於站上五月天的舞台，當初寫完這首歌後，就一直想完整呈現這首歌，大家好，我們是六月天。」
「你睇下個月亮幾大幾圓！」呢招除咗用嚟追女仔，原來仲可以呃到林俊傑開金口唱多首。(微博圖片)
當JJ正準備下台時阿信忽然話：「不如JJ你多唱一點！」台下歌迷當然贊成，不過綵排明明無呢段，JJ唔知阿信咩葫蘆賣咩藥嚇到口窒窒。原來阿信係想考考呢位音樂才子，見到月亮又大又圓就提議一齊唱《月亮代表我的心》。金曲歌王又點會被難到呢，JJ唱到副歌最後一句即興改詞「月亮代表五月天」阿信亦喺下一段改詞回敬「月亮代表JJ Lin」高手過招最大得益嘅唔使講當然係樂迷啦！