【平安谷】龔嘉欣被劉江瘋狂打：我嘅眼淚即刻飆出嚟！

首播第一個星期就有25.6點收視嘅TVB劇集《平安谷之詭谷傳說》，有咁好成績有部分原因，應該係因為劉江喺戲中會瘋狂打一班女演員，睇到唔少觀眾勁肉緊！而昨晚劇情就講到劉江發現自己之前中毒，原來龔嘉欣才是原兇，佢仲係大庭廣眾之下被劉江怒打，之後仲要被逐出家族，仲要同寶貝仔被逼分離。龔嘉欣昨晚出席台慶頒獎禮慶功宴接受《香港01》訪問時就透露，「嗰陣又用石仔、鞋咁擲我，雖然係道具，但係咁遠擲過嚟，真係有啲痛。」相信有好多觀眾睇完都好肉赤！

咁樣俾人打話唔痛就呃你嘅，龔嘉欣就指當時拍呢場戲之前都同劉江講，「你真係打落我度啦，我想做得真啲。點知一roll機，我嘅眼淚即刻飆出嚟。」其後記者問到係咪已經係套戲打得最勁？龔嘉欣即刻流露出一副奸笑樣，「我話俾你聽，唔係呀！劉老師仲有無盡咁繼續衰落去，佢真係好衰㗎！」睇嚟，劉江繼「講呢啲」之後好快又有新潛力圖出現喇！