武神李嘉教你點分真高手：倒三角身形上唔到戰場㗎！

42吋胸肌、8嚿腹肌，倒三角、男人完美身形，但原來大隻不等於好打，習武多年的李嘉表示，武術家和健美先生對身體要求是不同的。李嘉稱武術家身型是為戰鬥而不是為好睇，他說：「功夫唔係要求練到肌肉好靚，唔係要練靚身型，佢係練身體飽滿嘅狀態，呢隻我哋叫渾圓嘅狀態，唔係話有肚腩喎，係要虎背熊腰，條腰要夠紮實，背脊要夠厚，咁佢出拳勁度先可以好似棵大樹咁，由樹幹傳到枝葉，如果佢瘦猛猛，倒三角，條腰好窄，佢條腰根本承受唔到佢對腳傳去腰嘅力度。你見古代戰將留低嘅畫像，全部都虎背熊腰，健美倒三角身型上唔到戰場㗎，一打起上嚟，兩邊膊頭左fing右fing，中間條腰斷開，佢勁力亦斷開，跟住容易失重心，拳王泰臣都粗腰啦，功夫好嘅全部都粗腰，摸落去實淨，第二你要有粗頸，條頸食得住，人哋一嘢打埋嚟，條頸幼啲你就俾人knock低咗。」

自從《激戰》後，各男星都去練大隻，大家鬥低脂肪比率，但李嘉表示武術家為實戰，不會追求零脂肪，好睇同好打係兩回事，他說：「包括李小龍都好啦，佢最癲峰嘅時候，唔係拍《龍爭虎鬥》《死亡遊戲》嗰時，佢嗰時係最弱嘅時候，因為佢身體脂肪跌到太低喇，佢拍戲都暈，佢點會好打呢？佢最好打嗰陣應該係有段黑白片，佢用英文casting嗰時，你見佢塊面有少少脂肪飽滿嘅，佢嗰陣仲同長堤空手道嗰班人係到打。」聽完李嘉這麼說，真的放心吃東西，但記着李嘉說的粗腰是實淨的，不是大肚腩。

李嘉講完身形，就講出拳，他表示打人不是用死力，而係要懂得用氣，他說：「打人氣唔可以上浮，氣永遠下沉，西方嗰隻轉腰出拳嗰種，佢哋啲氣係上浮㗎，因為佢哋靠嘅係肌力，係會越打越攰，中國功夫唔係只靠腰轉動，佢係靠肋骨同脊椎嘅穩固，然後做一種叫油壓式嘅打法，就係我哋話嘅『氣聚丹田』，沉落去，將自己勁力一嘢灌落對方，就好似你見我打磚、打咩都好，動作唔駛好大，就係咁。」