【毛孩與我】一個照顧狗狗終老故事 Cherry:唔好輕言放棄

撰文:
最後更新日期:

愛護動物無分國界,《香港01》寵物頻道及其facebook專頁歡迎你投稿。本文由Cherry投稿,她分享了陪著狗狗走最後一般路的經歷,希望有同類經歷的狗主,千萬不要輕言放棄,要一齊加油努力。

大家好,我係Cherry,我養咗好耐(由2個月大養到17歲)嘅狗狗黃寶寶,喺上年年底因腎病離開咗,但我好希望將照顧有病老狗嘅經歷,可以與大家一齊分享。記著照顧有病老狗要有耐性,唔好隨便放棄,狗狗都會堅強咁撐下去㗎!

最後一次與黃寶寶去街的相片。(21/11/2017)(Cherry)

黃寶寶已經於24/11/2017去咗彩虹橋了……在遠方的你可好嗎?

你上次入醫院(07-2016),醫生同我講可以救你一次,如果唔救你,你應該好快就會離開,因為你嘅驗血指數已經爆曬標,爆到睇唔到讀唔到毒素,試下吊鹽水幾日,睇下有無好轉,有就睇你自己命數,無就無法子了,已經盡曬力。

帶著黃寶寶遊山玩水,遊走香港不同地方。(Cherry)

最後,黃寶寶好叻女,喺醫院吊咗鹽水幾日後,毒數已回落,可以出院。醫生話,一路食藥,Keep住每日打皮下水,隔2-3個月覆診一次,其實都無咩可再做,一切就靠黃寶寶自己。

黃寶寶,我們還很想念你。(Cherry)

一個月又一個月,喺07/2017年開始,黃寶寶身體突然變得差咗,仲喺一星期內,由跌跌碰碰,到完全無辦法自己起身,行唔到。但黃寶寶喺呢段時間,接受唔到自己行唔到,不停大叫要起身,叫足全日全晚。見到咁嘅情況,我同老公已經立即訂輪椅車車比黃寶寶,但都要點時間,喺嗰時開始佢無晒信心,無哂意志,不食不喝,情況好差,沒有最差只有更差,我見到咁真係好難過,好心痛。

有好幾次,我有想過要放棄佢,因為唔想佢咁辛苦,但呢個係我最唔想嘅決定。咁我唯有每日每晚堅持要畀飯畀水,畀補充品佢,食個飯要超過1個鐘,飲水飲到四周圍都係,但我都要堅持,不放棄。到收到輪椅車車後,黃寶寶終於可以再次自己站起來,之後佢慢慢就無再叫,佢信心意志都慢慢一齊返來了。開始慢慢飲番水同補充品,開始慢慢食番飯,呢刻我真係好感動!

呢個幾月來無白費到我嘅心機,到今日佢自己仲可以主動食飯、飲水,我真係覺得係一個奇蹟,好感恩。多謝上天畀我再愛黃寶寶多點時間,喺到好想同大家分享下,如果大家嘅家中都有需要特別照顧嘅狗狗,希望大家都努力加油,不要放棄,希望有奇蹟會發生喺每一個狗奴才同狗狗身上,希望大家狗狗都要身體健康、快樂。

黃寶寶堅強地撐了17個月,真係好叻女。(Cherry)

最後黃寶寶支持左17個月。對,係17個月,係一個奇蹟來的。好感恩,謝謝你黃寶寶,我知道你去到最後嗰個月開始好辛苦,又完全食唔到嘢,因為肚子好痛而大叫,氣喘到要氧氣機出動,大小便都去唔到。我知道係時候,我心中有數,雖然心裡萬般不捨得,但我明白離開先係對你最好的。黃寶寶,現在你自由了,無病無痛了,不用再畀我迫你食飯、食藥、打針;不用輪椅、不用尿片,你可以再次喺彩虹橋到奔跑,幸福快樂地生活,去到記得搵家姐黃菲菲呀……

(Cherry)

最後,黃寶寶多謝你同我們一齊堅持咗咁耐,黃寶寶嘅生命力好橫強,就算到最後行唔到,用輪椅都要堅持每日行行行,令我學會做人都要有耐性、耐心、堅持、堅強。

黃寶寶身體已很弱,但牠仍堅持下去。(Cherry)

黃寶寶你嘅使命完成了,畢業了‍。再見了黃寶寶,多謝你帶畀我同爸爸嘅快樂,最開心嘅回憶,係我們這一家真係去過好多地方,香港、九龍、新界、離島、大嶼山通通都有著我們的腳印。我們的回憶,真係好開心快樂,我會永遠記住,黃菲菲、黃寶寶,我愛你們,我相信總有天我們會再聚,現在只是暫時分開的……Love u,再見了~

17歲的生日!(Cherry)

+3
+2

#輪椅戰士黃寶寶
#愛是一輩子
#愛是不離不棄
#我們的腳印,我們的足跡
#黃寶寶使命完成了
#黃寶寶再見了,我愛你



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。