【每逢大事講故事】非常外父揀女婿 邊個先係白宮幕後玩家?

撰文:
最後更新日期:

為大家說個可歌可泣、相依為命、爭權逐利,兼有俊男美女的故事……之前,飛雲要鄭重宣布一個消息:過埋星期五,特朗普為正式成為美國總統。

白宮之中,到底邊個先係幕後玩家?(圖片來源:網上圖片)

美國總統特朗普,真係講起都唔慣。美國人好愁之餘,我諗特朗普都好愁。當選當日,助選團隊有人歡呼,有人拍掌,惟獨特先生一臉愁容,撓晒頭咁,雙目無神。咁又係,70歲人先黎「跳出comfort zone」轉行係頭痕啲,如果後生一半呢……咦特朗普正正有呢個選擇喎。

話說特朗普有個靚仔女婿叫Jared庫什納,今年35歲,志願係成為外父背後的男人,早排亦都如願以償,被特朗普任命為白宮高級顧問。其實係競選期間,特朗普的幕僚已經當正駙馬爺係大佬,咩都要先過佢果關。而特朗普當選後,無論是拜訪白宮還是會見日本首相安倍晉三,都把Jared帶在身邊,所以今次任命都不叫人意外。嗱睇吓,特朗普個女同佢老公,同安倍都幾啱傾㗎……

(美聯社)

由特朗普大樓金碧輝煌的土豪金設計,到靚到發光的大女Ivanka,連揀個女婿,都係靚仔過人嘅青年才俊。特朗普呢家人,真係閃到你盲。

成家人拍埋,加埋金碧輝煌嘅背景,都係閃到人盲。(網上截圖)

Jared同特朗普一樣,有個地產大亨老竇,年少就接手家族生意,而且一接手就將公司由新澤西地頭蟲,轉型為曼哈頓地產新貴。有生意頭腦,年少有為,儼如後生版特朗普,連美國媒體間唔時都會用特朗普mini-me嚟形容Jared,外父自然覺得好有親切感啦。Paypal創辦人、特朗普嘅重磅支持者Peter Thiel就形容:「如果特朗普係CEO,Jared就係COO(營運總監)。」

年輕有為又靚仔,叫飛雲自何自處。(美聯社)

成為被選中嘅細路,斷估都唔係因為靚仔咁簡單,亦恐怕唔係上帝嘅意思。Jared管理嘅競選計劃並唔簡單,當希拉里倚重傳統媒體,特朗普就同Jared就當呢次競選係一場生意,Jared在欠缺資源嘅情況下大打逆境戰,以數據分析精準針對聽眾宣傳,最終不單止贏咗,仲改變埋大選生態。

相信Jared都有咁樣同自己講過,「Jared不會怕」。(網上截圖)

Jared唔只撈地產,仲要搞媒體。人哋就發財立品,而家時興係發財開媒體。Jared 2006年收購埋周報《紐約觀察家》,做傳媒老闆。Jared仲要同啲編輯相處唔多好,收購之後,總編轉完又轉,其中一個編輯話:「他其實好鬼憎記者同傳媒,真心。」

做左傳媒老細,可以出出入入好多場合,又可以打入傳媒圈子,最右邊果個係有百年歷史嘅媒體The New Republic嘅總編。(Getty Images)

眾所周知啦,做傳媒唔通貪賣紙賺錢咩,Jared得到最大嘅回報就係紐約五光十色嘅社交生活,仲同傳媒大亨梅鐸做埋好朋友。正所謂「發達升官娶老婆」,Jared就跳步先娶靚老婆。Ivanka同Jared係朋友介紹下認識,一見鍾情,本來只係打算做生意,做做吓變做人世,Ivanka仲跟老公信埋猶太教,終於係2009年共諧連理。

一對金童玉女,睇到人目不轉睛。(網上圖片)

之但係,阿媽教落咩呢,正所謂靚仔無本心,雖然阿媽當年可能只為鼓勵飛雲,但我都信世事無可能咁完美嘅!呢個風光駙馬爺都一樣有啲黑暗面。Jared係哈佛畢業嘅尖子,但有傳媒踢爆當年原來佢成績唔好,但佢阿爸捐左一大筆錢畀哈佛,就咁啱,唔知點解,忽然間,佢就入到哈佛了。真係唔止買樓要識投胎,入名校都一樣啫。有同學仔仲話Jared讀書果時好炫富,校園入面都要揸架Range Rover周圍走。

而Jared阿爸雖則話係地產大亨,但就好小氣。佢啲員工爆料話,Jared阿爸好鍾意扣糧,「個個星期我哋開會,都要睇一輪帳單……他或者會簽,又或者會話,畀四成佢地啦,畀五成佢哋啦。即係,如果可以畀少啲,點解要畀足十成十呢?」

(網上圖片)

Jared就喺如此教育下長大,到10年前阿爸最終被判入獄。佢罪名就多囉,逃稅、非法政治獻金、收買證人,仲搵妓女引誘妹夫,拍埋片,企圖令親妹拒絕同政府合作。阿爸入獄後,留畀Jared嘅地產王國有2.5萬幢房屋,仲有寫字樓、工廈、舖位、土地。又要講多次,成功靠父幹,真係永恆嘅真理。

呢個就係Jared阿爸喇。(Getty Images)

咁Jared本身係點嘅人呢?佢同外父特朗普好唔同,沉默又專注,而且出名孝順,仲要係個「老人精」。人哋鍾意睇「姊妹淘」,Jared交友就最愛「長輩淘」。

佢讀書果時入到兄弟會,點知啲friend party嗰時佢坐埋一邊讀書,人哋玩新人會駛人幫手執屋、灌吓酒,佢就叫啲新人返教會;同學仔讀書考試玩通宵嗰時,佢已經喺附近炒樓,仲賺左2000萬美元。35歲生日果陣,後生細仔嘅佢,生日會竟然請嚟一班長輩。連席上其他賓客都話,客人年齡中位數睇嚟都有Jared嘅一倍,有成70歲喎。咦,咁唔怪得佢同外父大人咁啱嘴形喇。

如果美國都興呢家野,可能Jared一打開個Whatsapp就全部都係呢啲長輩圖。

熱愛長輩嘅佢,可以想像到家中兩老佢都會好愛護。唔知係咪因為顧家得滯,搞到Jared似乎有啲小器。話說新澤西州州長克里斯蒂(Chris Christie)一直都有份幫特朗普籌備競選活動,係共和黨嘅新星。原本特朗普諗住搵克里斯蒂做副總統嘅人選,但就咁啱,唔知點解,忽然間,轉咗副總統彭斯頂替。克里斯蒂未有即時離隊,大選結束後,特朗普亦想搵佢擔任交接團隊的主管,但係過一陣又再次被人換咗落嚟。而咁啱得咁蹺嘅係,10年前判Jared阿爸入獄嘅就咁啱係克里斯蒂。

(網上圖片)

但係作為二戰種族清洗倖存者嘅孫仔,Jared對住大右派外父的反猶言論,位置似乎有啲尷尬。Jared阿爸本身係民主黨金主,而且支持唔少猶太活動。Jared係呢個情況下,點樣「華麗轉身」呢?好有長輩緣嘅Jared,再一次得到朋友嘅「襄助」,令佢慢慢向右轉。Jared同傳媒大亨梅鐸好friend,一星期會講幾次電話,仲多過飛雲溝女。兩個人不時會分享吓啲保守派學者著作,講講吓政治立場唔多唔少有啲變化,令Jared由中間偏自由派走向保守。

而家Jared坐擁地產王國,都唔夠,打算再坐擁真正大國。所以靚仔女婿將公司賣畀細佬後,就進入白宮垂簾聽政。但特朗普嘅簾後又點止一個人?係邊個,不如聽吓前輩點講:

真正嘅大佬其實係......

話說有一次真係好經典,係特朗普勝出總統大選之後幾日,眾議院少數派領袖佩洛西(Nancy Pelosi)就打電話畀特朗普,交流一下二人對時政嘅觀點。當傾到女性議題果時,本來傾得好哋哋嘅特朗普突然做咗件出人意表嘅事——將個電話隊咗畀Ivanka。哇代總統發言喎!

同老公一樣「識投胎」嘅Ivanka,一直深得老竇信賴。作為成功事業女性,Ivanka一直係daddy爭取女性票嘅堅實王牌,展現出嚟嘅形象就係:商界女強人、靚袋、靚仔老公、超得意仔女,務求羨慕死人。而且佢好識講嘢,身為名媛嘅佢,上節目提到daddy嘅出位說話,佢輕鬆化解:「我諗全人類都經常被自己父母搞到好尷尬。」

Ivanka Trump(@ivankatrump)張貼的相片 張貼

Ivanka基本上擁有所有女性想要嘅嘢,梗係受歡迎啦!

識得Ivanka同Jared嘅人話Jared係好鍾意計算謀略,而Ivanka就好識睇眉頭眼額,而最重要係,佢daddy真係好錫佢。細細個嗰時,Ivanka小息偷偷地打畀佢阿爸,特朗普係必定會接;大少少做model,daddy更開心,仲四圍同人講自己有份「創造」呢個大美人,非常招積。而家Ivanka有埋自己時裝生意,夠靚女自己做埋宣傳,佢自己咁話:「我哋搵間傳媒做訪問咪得囉,隨時上埋封面,點解要買廣告?」

生得靚,自己做埋代言人啦!(網上圖片)

以為佢好似啲名媛咁,得閒繡吓花設計吓時裝?係飛雲呢啲凡夫俗子先咁諗啫,人哋係做大生意㗎,出身做併購,而家時裝生意主要都係借個名畀其他設計師用,自己賣貨收入佔一成都無。當年阿爸盤生意出事,Ivanka幫手四圍撲,飛杜拜、拉斯維加斯搲生意,又睇地盤、幫手宣傳營銷。所以對特朗普嚟講,今日嘅江山,係Ivanka有份幫手打返嚟,你話daddy點可能唔錫到燶。

Ivanka Trump(@ivankatrump)張貼的影片 張貼

特朗普競選嗰時,Ivanka唔只係花瓶,仲「好打得」,幫阿爸站台演講,出場仲多過後母Melania。特朗普曾經講過,如果要揀一個女性入內閣,佢希望果個係Ivanka,哇,搞到王家衛啲對白咁嘅。Ivanka仲同時兼任參謀、說客同宴會搞手。特朗普當選後同死對頭戈爾會面,背後推手就正正係Ivanka。而家Ivanka已參與不少特朗普的電話及實體會議,包括與各國元首的對話。

當特朗普發言果時,其實Ivanka望到實。飛雲都想Ivanka眼中只有我。(Getty Images)

一個獨排眾議進入白宮,一個名義上無職銜但手握大權。兩公婆將會遷入華盛頓,等佢哋可以同daddy再近一啲。兩個權力頂峰的人同床共枕,未來美國的權力核心或許唔單止係白宮,亦會喺華盛頓Kalorama區呢間大宅。個情節咁熟嘅,好似子華神都講過,呢個係一個三位一體嘅宗教團體……阿們……

咁搞法,點止當統治國家生意咁做,直頭當家族生意添啦。呢啲故事,睇開TVB嘅香港人好熟啦:後宮干政丫嘛。但姐係咁,對飛雲我呢條花生友而言,崔順實果啲就叫干政,Ivanka呢啲就叫叻女囉。

仲想知道更多美國總統特朗普的事? 入嚟【呢度】有詳細報道



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。