民主教室周年慶補祝劉小麗牛一　 阿牛化身拍賣官紅酒大賣

小麗民主教室周年晚宴今晚（4日）舉行，原來昨日正是民主教室創辦人劉小麗生日，一眾教室成員及民主派友好人士藉此機會，幫小麗老師點蠟燭切蛋糕補祝生日。
前立法會議員阿牛曾健成則仗義化身拍賣官，向台下一眾同路人拍博頭，一次過賣出30多瓶、每瓶800元紅酒，為民主教室籌款。

其實，劉小麗早前已打「開口牌」，講到明自己被DQ後，民主教室幾近「乾塘」，因此黨慶晚宴是籌款晚宴，希望各位友好多多支持。

劉小麗昨日牛一，不知是否壽星特別旺，據了解，今次晚宴36圍一早售罄，甚至因為反應太好，出現輕微「超賣」情況。不過，一眾友好心情就未受影響，有人更話「坐逼啲溫馨啲」。

到義賣紅酒籌款環節，阿牛就例牌擔任拍賣官，現場所見該環節反應亦十分熱烈，幾乎每圍都有支持。看來，劉小麗今次必定「生日快樂」。