【博評】尼斯恐襲的三個觀察
法國總統奧朗德（François Hollande）呢刻當然好頭痕，十分頭痕…今次尼斯恐襲，明剃佢眼眉，話唔係特登揀呢日，冇乜人信。法國保得住歐洲國家盃期間冇事發生，偏偏一完就出事。係咪鬆懈咗？唔知了…點解又係法國？其實上次巴黎恐襲已有人講過，原因不外以下幾樣……
法國總統奧朗德（François Hollande）呢刻當然好頭痕，十分頭痕。
7月14日，星期四，巴士底日，即係法國國慶，奧朗德嗰頭先話，舊年11月巴黎恐襲後實施嘅緊急狀態令，月尾就會結束，話冇可能無止境咁延長。講完都未夠12小時，發生咗尼斯恐襲，奧朗德唯有宣佈緊急狀態令再延長3個月。
觀察一：法國由頭到尾都係「高危」
今次尼斯恐襲，明剃佢眼眉，話唔係特登揀呢日，冇乜人信。法國保得住歐洲國家盃期間冇事發生，偏偏一完就出事。係咪鬆懈咗？唔知了。
馬航MH17出事嗰日，除左Oh my God，你仲會聽到邊句嘢？當然就係：「又係馬航？」因為，幾個月前先有架MH370消失咗。
正如，見到尼斯恐襲，除左Oh my God之類的反應，少不免就會係問：「又係法國？」
點解又係法國？其實上次巴黎恐襲已有人講過，原因不外以下幾樣：
首先，值唔值得都好，但法國在各地出兵不遺餘力，自然「仇家」較多。
相比之下，鄰國德國基於歷史理由，並冇好積極參與軍事活動，又好似真係少啲受襲。
第二，法國多穆斯林。
法國穆斯林人數，多過巴基斯坦，多過美國（但美國人口多法國好多）。再講一次，唔係所有穆斯林都係恐怖分子，但的確好多恐佈分子都係穆斯林。而在法國，穆斯林，特別係移民二三代，當然面對身分認同問題，以及搵唔到工溝唔到女之類的問題。
第三，不能否認嘅係，法國係比較易落手的地方。
美國一樣處處樹敵，買槍又易，但近年恐襲唔多（槍擊就多），點都多唔過法國。原因當然同邊境關卡有關。咁法國是歐盟嘛，隔離就係新一期的恐怖主義溫床比利時。同時亦因為情報工作似乎出問題。但，法國人出名重視私隱，唔會好似美國人咁願意因為國家安全而放棄私隱或個人自由。
第四，法國曾經有大量嘅殖民地。
喺非洲大把，中東都有敍利亞同黎巴嫩（亦因為咁黎巴嫩菜在中東菜系中一枝獨秀）。你會話，英國都有。但，法國同英國唔同，法國保持法國人的浪漫，分手都藕斷絲連，繼續保持影響力，兼對前殖民地的政治經濟指指點點，甚至上下其手。結果好多時就在前線，正面同伊斯蘭國或阿蓋達開戰。
觀察二：群眾開始冇乜反應
但，又係法國，又如何？我最留意嘅，始終係大家的Facebook頭像。目測，今次唔多人pray for France之類。
呢啲頭像，香港人都可以嘈一大輪。唔換又鬧，換又有人鬧，甚至研究邊啲應該換邊啲唔應該換。有人話Pray for France但唔Pray for Turkey就偽善。又有人反擊話對土耳其肯亞就冇乜感情，但因為睇歐聯睇巴黎聖日耳門就對法國好有感情（真！我真係見過有人咁講），話要一視同仁果啲先偽善之類。煩到癲。
但今次值得研究，係完美的「社會實驗」。目測，就真係少咗好多人pray for France。其實有點奇怪。地點，都係法國，唔係土耳其肯亞。日子，仲要係法國國慶，理應更加震撼。講人數，今次傷亡未必有巴黎咁多，但遠超於2015年1月的查理周刊槍擊。但當年人人都Je suis Charlie。
排除所有其他可能性後，剩低嘅，就係答案──哪管望落幾咁不可能。不錯，你好難接受，但我好相信，原因係因為，慣咗，麻木咗。
觀察三：恐襲只會愈見頻密 而且唔一定關移民事
上次比利時恐襲後寫過篇文講「恐襲經濟學」，最尾有寫到希望第日唔使再引番。不幸言中。點解我哋對恐襲愈嚟愈麻木？因為，世界已經唔同咗，新常態係愈黎愈多恐襲，你只能live with it。
何謂恐怖襲擊，往往係官方「定性」說了算。劫機放炸彈之類就好明顯，但開槍射人開車撞人，就真係難講。首先要睇犯案者種族，若係白人往往就係「精神錯亂」（例如挪威嗰單），「反社會人格」。係穆斯林或黑人就變成「恐怖襲擊」。
學術啲定義，恐怖襲擊應該係有政治訴求同目的。查理周刊事件就目標明確（你認唔認同另一回事），我唔鍾意你畫漫畫醜化先知同我宗教。巴黎恐襲，已經有啲模糊，算係報復法國空襲？今次尼斯，更加係獨狼出馬，有乜目的都未必知。
防？點防？防劫機當然可以，防炸彈都仲可以。巴黎咁無啦啦食食下飯有條友嚟開槍掃射點防？尼斯仲誇張，槍都唔使，國慶日有人群，無啦啦有人開架車過嚟撞，點防？
對恐怖分子嚟講，呢啲方法襲擊軟目標（上次巴黎係戲院同餐廳，今次尼斯係海濱大街），「成本低，效益高」。只要搵到個人肯唔要命（事實證明一街都係咁嘅人，「為革命願意流血嘛」），你可以點防？連組織訓練財政支持都慳番。
你想用profiling，預先搵出可疑人物，一樣難過登天。不錯，幾次涉案嘅都係穆斯林，但亦僅此而已。唔一定係失業的憤青，甚至唔一定係狂熱份子，唔一定係坐監放出嚟的。巴黎恐襲主腦就嚟自中產家庭。
同樣地，極右或香港啲所謂「本土」青年企圖抽移民水，亦係多餘。吾友廖詩颺〈恐懼難民不如擔心本土〉一文，寫得極好。一次又一次，呢啲歐洲恐怖分子，夠哂本土。今次尼斯呢個，聽聞都根本係法蘭西公民。同收唔收移民根本冇關。
接受吧，慢慢你就live with it。其實最弔詭係，在呢個層面，恐怖分子係self-defeating的。頭先講過，同查理周刊恐襲唔同，巴黎或尼斯恐襲，斷估主腦同受害者素不相識冇乜仇口，分分鐘錯手殺埋穆斯林。巴黎或尼斯恐襲，為嘅唔係自己私人恩怨（對比下查理周刊），亦唔係有特定要報復的對象（相比下美國達拉斯早排有人殺警），只係想引起恐慌。佢愈做愈多，大家麻木後，就開始引唔起恐慌。既然冇咁恐慌，我相信，冇乜人會因為今次尼斯恐襲，而俾壓力法國政府，覺得法國應該停止現在的軍事活動。
（本文純屬作者意見，不代表香港01立場。）