【來稿】連中國制度ABC都唔識,點靠你為香港爭取權益?

撰文:
最後更新日期:
政治係一場博奕,相信非建制派所有人都會同意港中之間晌政治角力上會係對手關係,但係我地對依個對手又有幾了解呢?
余未

大家是否了解人大與政協的分別?(視覺中國)

文:余未

如果你嘅政治取向係非建制嘅,不妨嘗試答下以下問題:

1. 人大同政協係咩嚟,又有咩分別?

2. 中國嘅所謂人民法官係點樣產生?

3. 中國國民戶籍遷移,係由遷出地定遷入地審批決定?

相信三題都識得答嘅非建制派朋友,應該係少之又少,更多嘅答案都係「知嚟做乜」,而我相信除咗平時對政治發表意見嘅一般市民外,就算係真係以政治當作職業嘅非建制派政治人物,能夠答到以上問題嘅都唔會好多。

畢竟,一講到了解中國,大家就諗起建制派嘅「國情班」,聯想到「背靠祖國」依堆建制成日用嘅詞語。我唔係叫大家去睇咩抵擋百年一遇大洪水嘅十大建設之後拍晒手掌咁,之不過作為政治上嘅反對派,我地係咪亦都要去了解熟悉「中華人民共和國」依個國家,由政治到民生嘅各種制度呢?

晌過去幾年,泛民又好本土派又好,都一直都不遺餘力咁同人講香港同中國唔同,泛民講嘅係「一國兩制」,本土派就係話「Hong Kong is not China」。但係不論邊個講法,通常都係由文化方面出發,而比較少由制度方面着墨。泛民講「一國兩制」,核心內容係中國無權無理改變香港嘅生活方式,兩制中只講香港懶理中國;本土派就梗加覺得中國唔關佢地事,自然更少提及。

游蕙禎在宣誓時展示藍色橫額,上面寫着「Hong Kong is not China」。(李澤彤攝)

對於聽眾嚟講,依啲講法又夠唔夠說服力呢?對內嚟講,香港係一個移民城市,本身就係一個文化熔爐,唔少人都係同時認同「香港人」同「中國人」兩個身份;對外而家絕大部分歐美國家都講民族共融,一個國家往往要包容唔同嘅文化。所以,無論係香港人定外地人,都會有人理解唔到點解純粹因為文化唔同,就要將香港同中國切割。

相對主觀嘅文化差異,港中兩地制度上嘅分別就係實實在在,連最「擁抱中國」嘅建制支持者都唔會否定。可惜以往我地講港中兩地制度差別嘅時候,往往係流於片面,香港有民主人權而中國冇,香港係資本主義而中國唔係,依類比較過於抽象或者涉及意識形態,一般市民未必會感受好深。

如果我地轉個角度,由制度方面出發,向內向外宣揚香港同中國有制度上嘅分別,我地要做嘅第一樣嘢就係首先要了解中國作為一個國家,晌政治同民生上嘅各種制度,再嚟同香港嘅制度做一個全面嘅比較,先可以令香港人同其他人,充分了解晌香港生活同晌中國制度下生活係有咩分別。

如果有外國朋友問你香港中國有咩分別,你會否剩係識答香港人會排隊搭巴士同唔會週街「方便」?(視覺中國)

面對中國嘅政治民生新聞,我地好多時都只會講句「中國的會爆炸」或者「這就是中國」嚟抽水,但係能夠摸清背後脈絡嘅朋友就係鳳毛麟角了。中國政制係相當複雜,要了解絕對係要花上唔少嘅時間,但係我相信有一定程度嘅了解,對非建制派不論係爭取香港嘅權益,抑或說服大家接受港中兩地分別,都係會有唔少嘅幫助。

如果你支持嘅係香港晌「一國兩制」嘅框架下,爭取最大嘅權益,但係你連中國內部每個行政區域有咩權限都唔知,例如深圳有權審批遷入戶籍而香港就冇單程證審批權,又點樣靠你去為香港爭取權益呢?

如果你支持嘅係香港政治上從中國切割開,外國友人問你香港中國有咩分別,你就剩係識答香港人會排隊搭巴士同唔會週街「方便」,咁你又點期望會有外國友人支持你?

政治係一場博奕,相信非建制派所有人都會同意港中之間晌政治角力上會係對手關係,但係我地對依個對手又有幾了解呢?《孫子.謀攻篇》寫道:「知彼知己,百戰不殆;不知彼而知己,一勝一負」,面對比我地勢力更大嘅對手,如果我地做唔到「知彼」,唔好話要一勝一負,要守住而家嘅陣地都係凍過水了。

(本文為投稿,稿件可電郵至iwanttovoice@hk01.com;文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。