Fast fashion潮流 大學生嫌洗衫貴過買衫 驚覺浪費改買舊衣

撰文:
最後更新日期:

「大家生活條件比較好,唔會覺得有啲嘢值得珍惜!」

年輕人總愛走在潮流尖端,買衫打扮時容易被Fast Fashion(快速時尚)牽着走,甚至認為「洗衫貴過買衫」。不過,有大學生寧買二手衫代替新衫,堅拒倒模潮流。

中大山城角樂衣物部開業1個月,提倡二手衫回收,讓中大學生換取衣物,最近展開時裝週舉辦二手衫社區遊活動。(資料圖片)

Fast Fashion的衝擊下,年輕一群開始向倒模潮流於「說不」。最近,一群來自中文大學的學生忙於為「山城角樂衣物部」舉行活動,除了推廣回收二手衫,在上周更發起「時裝覺醒週—衣物的第二人生」,推出二手衫社區遊、邀請時裝達人為學生配襯二手衫。

買衫雖然是人之常情,但過度消費就會變成壞習慣。《香港01》訪問負責衣物部活動的學生霍穎婷。她坦言,自小受愛美的媽媽影響,特別喜歡逛街買衫,高中時最愛約三五知己到旺角中心購買心頭好。「以前1個月買4、5件衫,衣櫃裝到滿晒,買完又會發現唔啱着,搞到要捐出去二手回收站!」她更苦笑說,媽媽買衫的習慣比她更頻密,家裡設有衣帽間,超過數百件衫,有時都禁不住勸媽媽「收手」。

霍同學說,曾帶朋友到二手衫店,希望薰陶他們接受買二手衫。(資料圖片)

不過,直至入讀大學,她開始掌握自己的打扮風格,不會再胡亂買新衫,反而喜歡到二手衫店「尋寶」。訪問當日,她穿着一件日本工人的工作服,雖然碼數偏大,她卻津津樂道:「Oversize都着到另一種感覺!加上呢件衫有好多袋,裝本書仔都得!」即使在二手店買到不太合身的裙,她都會嘗試改造,減少浪費。

認識回收膠樽 未知有二手衫回收

她說,「衣食住行」中,「衣服」佔據生活重要的一環,不少人對膠樽回收有認知,但二手衫卻未見普及。她舉出誇張的例子,稱身邊有朋友1個月可以買10件衫,有時會掉一大袋衫。霍驚訝一問:「吓?你就咁就掉咗佢?點解唔去捐呀?」卻換來冷冷的回覆:「可以捐去邊啫?都無人要!」她才發現,香港人對二手衫回收的意識不足。

有見衣物部提倡回收二手衫,她與媽媽舉腳支持,捐出10多件舊衣。她在上周六更擔當二手衫社區遊的導賞員,透過帶同學到長沙灣、旺角的二手衫店,平反他們覺得二手衫骯髒的壞印象。「中大學生困喺山上太耐,又未必住在舊區,我想佢哋連接返社區!」她十分欣賞聖雅各福群會Green Ladies二手衫店,揚言該店處理衣物有序。

對於二手衫店的形象,旁人總會覺得骯髒雜亂,但霍同學則認為,二手衫店是尋寶遊,有更大可能買到便宜衫。(資料圖片)

對於香港不少商場總有Fast Fashion店,她無奈表示:「好似成個社會都覺得Fast Fashion無問題,例如商場入面有好多Fast Fashion舖頭,無晒小店,可能唔係好覺。」她建議年輕人,買衫前考慮清楚,買一件衫不單衡量它的美感,而是反思背後製衣的工序,助長製衣工人被剝削的可怕真相。

可能大家生活條件比較好,唔會覺得有啲嘢值得珍惜囉!
霍穎婷

Canis喜歡買衫,但近年發現自己的衫堆積如山,開始停止常買新衫的壞習慣。(資料圖片)

Fast Fashion影響 認為洗衫貴過買衫 

中大山城角樂衣物部的發起人之一張依琪(Canis),過去亦喜歡買衫。她笑言,因為與家人共用衣櫃,擔心買衫被他們發現而被責罰,經常將衫收藏在床下底。當她在搬離宿舍時,發現自己有兩袋紅白藍膠袋裝滿的衣物,就開始反省,自己是時候減少買衫。

但Canis說,她有購買二手衫的習慣,又喜歡與同學交換衣物。因最怕與陌生人「撞衫」,因此較少光顧Fast Fashion店。在收集二手衫時,她見到多件同一款牛角Tee,反映大學生受Fast Fashion影響深遠。另一名成員姚祉媛(Cheryl)則指出,曾聽過另一間大學的朋友說,在宿舍洗衫貴過出街買衫,可見年輕一代對Fast Fashion影響深遠。

出到街好似倒模咁,希望同學都可以反思買新衫唔係唯一嘅選擇。
張依琪

試過一次過買10件衫

扮靚不是少女專利,男生也要裝身。就讀中大社工系二年級學生高漣祺,是衣物部的店員。他說,中學時期開始懂得打扮,經常到Fast Fashion店買衫,高峰期試過一次過買超過10件衫。其後因為自己修讀地理科,在網上搜尋得知,速食時裝造成污染,更會剝削工人,後來不敢再胡亂買衫,亦開始改到二手衫店,發現該店的衣服有「文青Style」,亦令他對二手衫改觀。

高同學(左)表示,男生都會有打扮的時候,雖然過去曾一口氣買10件衫,但後來覺得太浪費而減少買衫。(資料圖片)

港人每分鐘掉1400件衫

事實上,綠色和平去年統計過,港人每分鐘掉1400件T-Shirt,回收率低只有約3%。綠色和平項目主任鄧敏琳接受《香港01》訪問時表示,過去的調查亦發現,中國大陸有不少製衣廠,在生產Fast Fashion時,製作出好多有毒化學物,傷害當地環境,例如今季流行粉紅色,河流就會變成粉紅色。在環保團體與生產商角力下,都希望消費者及社會共同施壓,例如買二手衫代替新衫、積極回收舊衫。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。