【特首選舉.博評】今屆選戰的10個Reality Check

撰文:
最後更新日期:

呢個年代個個都講夢想。美圖秀秀母公司年年蝕錢但講夢想,薯粉同你講夢想,你樓下賣車仔麵嘅都同你講夢想。

選舉結果塵埃落定,係時候面對現實,小弟幫大家做下reality check,睇下今次選舉你「應該」要學到乜,有邊啲夢想只係迷思,完全經唔起現實考驗,一篤就碎過薯粉奶粉胡椒粉。

林鄭月娥當選成為下一屆行政長官。(視覺中國)

1. 林鄭根本坐定粒六

會計界選委龔耀輝話試過約林鄭,林鄭嗰邊話選完先由候任特首辦安排。林鄭回應就話冇件咁嘅事,又係口同鼻拗。但肯定嘅係林鄭陣營絶對冇驚過,甚至有奶粉連食薯片祝捷會都安排埋。狂妄又好有信心又好,所謂「黑天鵝」只係啲薯粉幻想出嚟嘅東西,大佬唔好拎美國總統或英國脫歐嚟比吖,人哋真係一人一票的。你見林鄭好不情願先係咁意學下用Facebook勉強開個Page,去到近投票嘅日子都唔使點再造勢,甚至候選人同場辯論啲建制選委都唔問嘢,less do less wrong la。至於點解咁老定?就去到下一點。

2. Who cares你嘅民意?

「民意」呢回事,真係呢兩屆特首選舉先走出嚟。CY上屆疑似挾民意最後偷襲唐唐成功,一時佳話。今屆薯片做得仲盡,落好多心機拎民意,事實上亦好成功。但亦只係去到呢步。民意逼唔到選委轉軚,更加逼唔到「阿爺」改變主意。到底係因為「阿爺」方針已變,定係「上次畀個高民意嘅CY你又係一鑊泡今次費事理你」,唔知。肯定嘅係,「阿爺」唔再同你玩民意呢套,下屆想選嘅記住。

3. 葉劉之死實屬必然

點解今次特首選舉安全系數仲係夠晒高?因為葉劉入唔到閘。根本劇情需要,葉劉等於哈利波特入面嘅鄧不利多,或者「哪一天我們會飛」嘅蘇博文,佢嘅角色一定要死(sorry for劇透),佢唔死台戲點收科?辛苦了。佢入到閘,就真係有機會葉劉林鄭二人兩敗俱傷啦(當然,阿爺可以再勸退一個,咁其實係幾時出手嘅問題)。

4. 阿爺根本唔使「欽點」,至少表面上唔使

特首跑馬仔至今,我見過最好嘅評論,都係馬嶽先生嘅《大紅燈籠高高掛》論。最高領導其實大可以打埋開口牌,不過領導不說,有得你哋慢慢估,亦唔介意薯片重提握手。總之一切在佢掌握之中,根本唔會去到咩選咗薯片出嚟唔任命嘅核突情況——因為根本唔會選到。

5. 薯片頂多都只係一個冇咁爛嘅橙

我不討厭薯片,但我頂唔住班薯粉,後期直頭你反對薯片你就係鬼你就係五毛,胡官就係鎅票臥底,十分恐怖。薯片年年估錯數又唔食粟米斑塊飯三十萬月薪做中產都算,831呀23條呀之類都算。最精采都係佢去愛丁堡廣場為龍和道干諾道「重新賦予意義」,真係媽媽咪亞。未算精彩,更加正嘅係第二日佢就講選址「與佔中無關,重申佔中是破壞法治和影響經濟」。一眾傳媒fact check當然沉默過馬田史高西斯。在講到煩嘅雞蛋同高牆中,薯片企邊面,十分清楚啦。有人話葉劉之類與虎謀皮鳥盡弓藏,咁薯片對成班薯粉更加係用完即棄衰過尿壺。

6. 薯片陣營根本唔係輸家

薯片當然想贏,但對佢嚟講分分鐘輸咗先係最好結果,畀佢上到台保證啲民望好快蒸發,唔信民望可以話咁快冇晒嘅請睇下蔡英文。今次衰咗,說不定5年後仲可以嚟過呢(分分鐘林鄭做唔夠5年添)。太老?迷思嚟的。5年後薯片先七十,胡官今年都唔止啦。況且「阿爺」政治一向敬老,再老都有,七十算係乜?而佢嘅競選團隊更加係大贏家,充份話你知點樣去造神。當然今次功敗垂成,但下次同下下次咩環境,又邊個知?

7. 政治「原則」嘅嘢話變就變,認真你就輸

ABC曾經係一個大原則,冇咗CY之後果然世界大亂。呢度講嘅唔係候選人支持度,而係種種所謂「政治倫理」。香港人都係簡單又善變,當時個個鬧唔要袋住先唔要23條,換個人講就即時冇問題。同樣地,有個講法話應該投畀自己心水嗰個,唔係睇咩大局。但投胡官嘅畀人鬧,投白票嘅一樣畀人鬧。總之一定要捧薯片否則你就係幫林鄭助選。又睇下呢班人之後點講。

8. 民望冇人care,甚至政客都唔care,你自己都唔care

直選票后葉劉,就入唔到閘,我啲年青朋友甚至普遍憎佢多過憎林鄭。反而從冇受過直選洗禮嘅薯片,就有人舉牌話係「民主之父」(定其實係想害死佢?)同樣地,地區直選票王朱凱迪投白票,其實我好欣賞,因為佢始終如一有原則。但佢同羅冠聰劉小麗等等畀人在網上鬧爆,做乜唔投薯片?爭你哋幾票就係千古罪人(事實證明真係諗多咗,爭幾百票咯)。點解香港啲政客好難有咩原則?因為選民都唔要原則。

9. 期望建制選委轉軚投薯片,不如等中六合彩

薯片作為建制中人(做咗N年政府高官呀),當然唔係一開始就陪跑。而人人都知佢同CY唔妥,但都可以做到財爺,可見都係阿爺可接受嘅人。最初你相信佢有機會,十分正常。但去到選前幾日,連全香港最有影響力嘅KOL李嘉誠都講到咁明,你都仲覺得「唔係嘅誠哥其實話中有話我哋聽唔出咋」,就真係太天真了。期望建制選委良心發現而暗票轉軚?請循其本,係咁有良心就唔係建制選委啦,有幾他媽的咁難明?你要兩百幾三百個建制選委良心發現,不如望「阿爺」良心發現唔任命林鄭。至少你只係要發一個夢,唔係幾百個。

10. 大輸家就唔使講啦

有話冇夢想同鹹魚冇分別,有話多謝薯片畀薯粉發咗個夢,我就覺得更加似食白粉。發夢又好吸毒又好,梗係過癮–如果唔使醒嘅話。醒返你發現其實乜都冇變過。除非你300+下屆可以變到500+,否則左玩右玩,其實都係冇改變「阿爺吹雞建制跪低」嘅簡單遊戲規則。覺得最衰都係CY佢走咗一天光晒嘅,未來5年大可以講「林鄭都係CY」,覺得薯片上台就萬事搞掂嘅,未來5年又繼續可以FF「最衰都係林鄭」。可以肯定嘅係離2047又近5年,你懂的。

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。