【職場．來稿】做老闆都有投訴？賤精老闆的敢言

做了四年的所謂老闆，不斷有人說要我學會接受一個事實，那就是成功的生意人未必等於成功的老闆。我的意思是，生意人是「對外」的身份，而老闆則是「對內」的稱呼。生意做得好，只代表錢賺得多，但生意做得好，並不代表員工會喜歡你。

老闆想出來的新點子，員工永遠會覺得你現狀還未做好，便開始想一些「死橋」出來，只會徒添成本，對公司百害而無一利。但如果新點子最終得到效果，員工便會覺得，不是有他們三頭六臂的鬼斧神工，那個新點子又怎會收到當初預期之效？沒有人會對你說，「全靠你條好橋呀老闆」。對，光是「奢望同事讚你一句」這種思想，已經會讓你變成一個很有問題的老闆。

老闆不能對員工說「我有壓力」，因為他們認為，你係賺最多嗰個，有壓力是常識吧。但作為老闆，你卻要無時無刻把員工的壓力指數保持在一個最佳範圍之內，壓力太大你怕他們頂不住，完全沒有壓力他們的態度又會散漫起來。如果有任何一個員工的壓力過大，你便會成為其他人在lunch time一起圍插的那個無定向喪心病狂歇斯底里變態老細。

老闆加大你工作範圍，你就說「當初冇話要做咁多喎」；你要求老闆加大你薪金範圍，咁老闆係唔係可以同你講「當初冇話要加咁多喎」。好簡單一個道理，你入嚟公司嘅時候同而家比較，如果工作量係完全一樣嘅，咁係唔係象徵式加你 3% 抗通賬已經對得住你有餘？可唔可以趁呢個機會問個哲學問題？到底，係有雞先定蛋先？我係咪應該加咗你人工，先至畀你做更加多嘢，而唔係畀你做更加多嘢，睇吓你做唔做得掂，先再考慮加你人工？

作為所謂的老闆，我不得不承認自己真係死好命。

以上三點投訴，全部是生意上一些朋友跟我分享過的牢騷，我本人少少同感都冇。

但我確實因而有啲羞恥，我到底算唔算係一個老闆？

第一，我的點子都是舊的，新點子永遠由員工提出，我只負責過濾；

第二，有幾個同事的電話，我放了特別的鈴聲，因為他們經常催我畀意見呢樣嗰樣，我好怕聽佢哋電話，所以其實我連給他們壓力的機會也沒有，因為我只是在不斷消化他們給我的壓力；

第三，我的同事不斷在擴大自己的工作範圍，which leaves me with only two options：一係請多啲人，一係加佢哋人工，怕煩的我通常會選擇後者。

我絕對唔係一個完美老細，因為每個人都會有啲嘢處理得唔係咁好，而其中一個我聽過關於某位同事對我嘅不滿，係我太過重視某啲同事，令我可能忽略咗其他同事。Sorry，我承認，某些跟我一起從零開始打拼的同事，我真的是對他們心存感激，而導致到我exceptionally有點兒厚此薄彼。

堅唔好意思，我會盡量改，但喺我改之前，我想公開地再厚此薄彼一次。

前幾日，我嘅PA向我辭職，理由係讀書。

聽到這消息，我竟然有意志消沉的感覺。

其他同事向我辭職，我也會感到可惜，但這位PA要離開這個決定，刺進來這一下，遠遠超越可惜這種痛。

她說要走的那個晚上，我由公司（地址在禮頓道）走到天后，抬頭看見「華姐清湯腩」這個招牌，才驚覺自己原來遊街遊了一個半小時。再之後那個晚上，我終於忍不住流了很多滴眼淚，因為我在她的Instagram看見一張照片，而這張照片是由我們之前一起拍過的很多張照片組合而成的。

照片下面，寫了以下一段：

有種關係叫老細和PA，或稱私人助理、秘書、丫鬟。一年364日腦細大晒，但係每年嘅4月1號丫鬟有權玩返腦細；丫鬟見到老細籮咗頂多可以微笑點頭，腦細見到丫鬟籮咗係會恥笑十世，而丫鬟只係可以反白眼但係冇得反駁；如果腦細有多過一位情人，丫鬟有責任保護腦細，阻止佢嘅情人發現，如果有的話；丫鬟知道腦細嘅秘密，而丫鬟當然唔會同人講，呢啲秘密包括佢嘅時辰八字、佢嘅女神IG、初戀個名、工人電話、用開嘅化妝品牌子、阿媽戶口號碼、隻狗用開嘅獸醫，而腦細連丫鬟全名都唔知；丫鬟同腦細只有喺整蠱人嘅時候先係最佳拍檔，其他時間都係各有各忙；十個有九個人都會問丫鬟同腦細有咩關係，聽得多到都懶得解釋；腦細放假丫鬟最開心，丫鬟放假腦細最傷心。好快就唔係腦細PA，但希望腦細陳三秒快啲成家立室生意越嚟越好，有興趣做三秒女朋友可以直接佢。

我想講，我上年4月1號玩咗佢一鑊杰嘅，佢今年玩咗我一鑊仲甘，費事喺度交待。

我想講，我冇情人，不過有一個女神係真嘅。

我想講，我係貪靚，不過都唔會化妝，嗰次買化妝品係因為要上鏡，而我嘅化妝師當然都係PA。

我想講，我點會唔知道你全名係Vivian Yuan，但如果你講嘅係中文全名，我認我之前唔知，不過而家識讀兼識寫，係源思穎。

我想講，多謝你，多謝你嘅容忍、多謝你嘅效率、多謝你嘅交帶，仲有多謝你令我明白一樣嘢。

一個腦細最開心唔係收到客戶嘅支票，而係收到一個已經遞咗辭職信嘅同事送上嘅祝福。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）