【廢青求職攻略】追求好人工好福利？好公司不如好上司！

人人都搵工，人人都想搵份好工，究竟點樣先係一份好工？打工仔最緊張當然係人工福利，「人工」建基於你個人經驗、能力同埋行業情況，所以真係因人而異亦無乜好爭議，但「福利」呢？就睇間公司有無良心、重唔重視挽留人才。我以前睇Offer都會睇人工福利而考慮接唔接受份工，但轉咗N份工之後，我認為有一樣嘢都唔可以忽略，就係入到去跟一個咩上司，因為真係「好公司不如好上司」。

公司有咩福利都假，要上司肯批先得

我返過一份工係OT有錢收嘅，仲要逐分鐘計返畀你，所以大家OT都會O得條氣順啲，當然有唔少人會濫用呢個制度，喺公司磨磨磨磨磨爛蓆，甚至全日都唔做嘢，然後放工時間六點先開工，做到十點放工就呃咗公司四個鐘OT錢。所以公司隨後就加咗條條款，OT要填表，寫清楚留喺度做咩Project，同埋要上司簽名作實，證明你真係有需要OT。　

此例一加，一眾Office醒目仔又變種，唔少鐘意「呃鐘」嘅同事變晒擦鞋仔，同上司混熟，熟嘅自然係又簽畀你唔係又簽畀你，但同一Team又不能有太多OT支出，為咗畀醒目仔「呃鐘」，唯有迫唔擦鞋嗰啲準時放工，即使係多嘢做都要準時走。你又以為準時走好爽？當你真係忙，明明要用十個鐘先做得完嘅嘢，得返八個鐘畀你做，你諗吓嗰八個鐘係迫得幾緊幾辛苦，真係連Lunch Time都要食住做。明明OT係有錢，但唔畀你OT，而工作量又唔會因此而減少，變相就係得個做字而享受唔到應有福利。

又試過一間公司，公司明明喺合約寫明每個月除咗有正常嘅銀行假同病假之外，仲有一日「隨便請」的假期，即係唔使醫生紙，又唔需要提供任何原因，就咁講聲「我請假」就可以每個月放多一日，當然，又係話為確保大家唔會同一日放、保證唔影響公司運作，所以要你上司簽名先有得放啦。結果，阿上司就每個月都簽畀自己放，有時佢會去剪頭髮，有時佢經痛想喺屋企瞓，總之佢自己就唔會錯過公司呢項福利，而班下屬呢？每次交假紙畀佢簽，佢都要問你原因（明明公司話唔需要原因都可以放），問完原因佢再幫你判斷：

陪阿婆睇醫生？放半日夠啦！

個仔想去主題公園？你留返星期六先去啦！

而明明，「無理請假」係公司福利，但決定權喺無良上司手，最後都係享受唔到個福利。

山高皇帝遠，你吹佢唔脹

而會提供乜乜讀書津貼、交通津貼、包你全家的醫療保險……之類的公司，多數都係大公司，因為大公司先有錢做呢啲嘢。而大公司嘅特點就係架構多，你好少可以同到集團主席講嘢，所以即使集團主席想對員工好啲，建議啲乜乜愛員工計劃，一層層落到嚟都會變晒樣。

你想申請讀書津貼去進修吓？你知唔知咁樣會令HR同事做多咗嘢？所以由你想拎Form開始，HR同事就已經叫你「等吓先」，等左幾個禮拜拎到張表，你交返去佢又唔知放喺位幾耐先幫你處理，結果，個課程都開始喇，你仲未知究竟張Form影印咗未。

我試過返份工有員工購物優惠，連我屋企人都可以享用嘅，但又係要填表，填完再左等右等，等拎表、等影印、等簽名都搞咗幾個月，以為終於得啦，點知就話個System壞咗，未入到我家屬資料，而整System就要等IT同事得閒，試問一間公司，有邊個同事會話自己「得閒」？做事分「輕重」，老闆隻Mouse壞咗當然係重中之重，秒速買秒速換；而幫同事申請購物優惠呢啲「無聊嘢」，當然每一日都係被排到最後啦，一等又差唔多半年，個System疑似整好，以為終於搞掂？隔咗咁耐，都要畀時間HR同事搵返你份表出嚟先得㗎！就係咁，等呀等，等到我辭職，最終都無用過個福利。　

所以呢，合約寫咩都假、理想幾崇高都只係得個「想」，最終執行嗰班人廢，所謂福利都一樣係廢。

（文章純屬作者意見，不代表香港01立場。）