【職場警訊】終於升職,先發現自己太天真?

撰文:詩寧
出版:更新:

出咗社會六、七年嘅你,大概都已經做緊senior或更高位置,有無覺得夾喺中間,比老闆捽之餘,下屬又成日呱呱嘈唔合作或者達唔到你標準?
呢篇文,係為你而寫嘅。

做中層,其實係成公司最無助嘅一群。(istock)

曾經仲係junior嘅時候,一邊做打雜嘢如剪報、data entry,一邊希望自己快啲升職,心諗升一級都好吖,可以處理啲難度高嘅task、可以有少少決策權、又可以點啲妹仔做嘢……當上司落低能order的時候,總係諗:「如果係我,就一定唔會咁咁咁……諗都諗到咁會增加咗成本啦…」

到咗今日,你終於知道,做中層要識分工、識讀心(以前只讀上司的心,而家要讀埋下屬的心)、處理各方人事關係、準確的決策能力。比起以前「剩係做」難好多。

  1. 接受自己係一個人工高咗少少嘅打雜

好啦,你終於升咗職。點知,老闆並無「移走」你啲打雜嘢,好多唔使點用腦、又鎖碎的工作,你仍然要做。點解?因為你一直都做緊、日日都係你負責嘅嘢,你唔知點開口話唔再做,當然亦唔會有英雄飛出嚟話從此以後唔洗你做,直到一日你真係爆炸、痴咗線,可能會引一引起注意力,發現原來你仲做緊junior嘅嘢,忙到爆煲,到嗰時都有望分返啲出嚟嘅。 

  2. 練習金睛火眼

下屬有疑難來問你,你首先要分清楚,件事嘅決策權喺你度,定喺你上面嗰個度?如果喺你度,都要好準確無誤咁落決定,因為決定岩咗就好地地,一錯?「係阿副經理叫架!」隻手指就指住你。做細嗰陣仲可以跳兩吓斜膊操話「唔識」,而家加咗少少人工,就個個都旨意你一打七㗎喇!

仲有呢,喺你趕proposal deadline嘅時候,仲可能不斷有人拎文件埋嚟比你簽,你要金睛火眼十幾秒望完就簽,然後個腦繼續返去比人打斷咗嘅proposal度。

以為升咗職就可以開心跳起yeah?少年你太天真了。

  3. 做衰人V.S. 做死自己

你做細嗰陣就算無講過大佬/阿姐壞話,都一定聽過其他同事講上司壞話,例如:「講到咁簡單,自己做丫笨。」、「痴線架,幅圖改完又改,佢想點呀!我今晚約咗人食飯,咁搞法實遲到啦。」無論你係心地善良定純粹唔想被詛咒都好啦,senior位得一個,你有得升,而舊日同你一齊咒罵上司嘅戰友而家就under你,假設公司有件麻煩嘢,你自己做定分比下屬做?

話哂friend過,真係唔知點開口?結果就自己食,比以前更加放唔到工。坐得呢個位,真係好多學問,又要班同事唔憎你,但又唔可以太friend,太friend就可能出現「叫佢唔郁」的情況。你要知道,「公私分明」係雙向的,你做得到,唔等於對方做得到,你派多幾樣嘢比佢做,佢好易就會覺得你「扮哂蟹」。

  4. 想炒人又炒唔到 

上述個案多數出現喺你在同一間公司,由junior升senior的情況;但如果你係A公司junior跳去B公司做senior,個頭開得好,多數唔洗怕比人定咗形、難開口叫人做嘢,因為所有人事物都是新的。

但當你發現有同事交唔足貨,你都係要忍忍忍,始終佢喺公司耐過你,要玩你係輕而易舉的事。

我聽過一個很麻煩的情況,就係日資公司好少炒人,除非你作奸犯科嚴重損害公司利益,否則佢都養你一世。呢類公司好易就養咗一堆公司垃圾,作為中層,下屬死唔進步,但上司不停捽你,夾喺中間嘅你唯有自己做哂佢,無論你點樣講,就係炒唔到個下屬,佢霸住個位但又做得差,曾經幻想升咗職可以點人做嘢,結果發現自己太天真。

諗返以前,明明你成日俾人點做呢樣嗰樣,點解?因為你做得嘢……兼好恰囉。而交到貨之餘又唔反抗嘅人的確唔多,所以最終升咗你……恭喜哂!新年記得請同事食飯喇!

電影《賭聖》劇照
(本文純屬作者意見,不代表香港01立場。)
你可能感興趣