【職場警訊】廢青辭職攻略：獲挽留不要沾沾

數數吓，話咁快又到咗出雙糧月份，再無「等埋發叔」嘅借口，可以隨時上網 print 張辭職信出嚟簽個名話走就走。
但總有人唔知點解辭職都要「鼓起勇氣」，又話唔知點開口，又要諗咩鐘數係最佳時機，又驚老闆問佢點解走……
諗呢啲實在多餘，既然你去意已決，lunch 前定 lunch 後交信真係無咩大分別。
但辭職又係咪真係無嘢諗？又唔係喎！無論你有 offer 先走定係裸辭，辭職都有學問同禮儀的。

唔好因為「人」而走／留

當你仲係學生嗰陣，就已經好多人同你講「出嚟做嘢係咁架啦」、「間間公司都係咁架啦」，當我轉過無數份工之後，係呀，當年啲人無呃你，真係周圍「都係咁」。即係點？例如當你奴隸用到盡，有同事日日坐喺度唔知做咩但唔使炒，有人咩都唔識但單靠擦鞋上到位，廢柴上司，仲有以講是非維生的同事……總之總有令你頂唔順嘅人！

所以你記住，唔好因為好憎某一個人而辭職，如果佢真係衰到令你連呼吸都有困難，你可以諗辦法「整治」佢，但唔係辭職避開佢，如果間公司好地地，因為一個人而走實在太可惜。

同樣地，唔係因為一個人而「留」，例如間公司明明無晉升機會、又長期蝕錢，公司比你份糧永遠只有「共渡時艱」而無「分享成果」，但偏偏有個對你好好嘅經理，教你好多嘢，甚至同你一齊捱……你千祈唔好因為公司有恩人而留，因為恩人都係會辭職／比人炒的，到時佢走咗，你就自己喺度喊。

聽過一個 case，Jennifer 間公司對員工刻薄到不得了，仲要長期好多麻煩事，Jennifer 嘅戰友都走得七七八八，佢都打好信準備走，點知請咗個新經理，極力叫 Jennifer 留低，因為所有舊人走哂真係好大獲！經理講好多動聽說話，同 Jennifer 食完一餐又一餐，又話會為 Jennifer 爭取合理待遇……新經理非常真誠仲滿腔熱血咁，結果成功打動 Jennifer，收返封辭職信。

可惜，最後新經理都係搞唔掂個亂攤子，發現自己份新工好伏，返咗一個月工就交信了，臨走同 Jennifer 講咗聲唔好意思。所以，公私分明，前途嘢都係理性啲好。

老闆留你係等閒事，唔好飄飄然

交完信，總有上司會同你傾幾句，無論對方係咩層次、咩交情嘅老闆，佢同你講：「愛我別走」嗰陣，你都唔好就隨便落決定，記得要問公司比咩 offer 你，有實際 offer 先好留低，唔好亂信承諾。

試過有同事 A 辭職（佢係畢業第一份工），交信之後經理留佢，同事 A 唔多唔少有啲開心，驚訝：「嘩！老闆竟然留我呀！」覺得自己原來都幾巴閉，佢當時個反應係遲疑咗一吓，經理留過咁多人，立即睇得出同事 A 係去意未決，立即講多一堆動聽說話，又話努力啲啦，出年有機會寫靚佢份 appraisal，試吓幫佢爭取升職。

基本上老闆口中「考慮」、「試吓」、「有機會」都唔係一個「offer」來的，呢啲叫「fake hope」！除非佢好清楚講到「3 個月後升你」、「加你 2,000 蚊人工」，咁你就可以諗吓留唔留，否則，走吧啦，一應承佢……分分鐘你就變職場觀音兵。

拍拖，個男人同你講：「我地可能出年結婚」，但又唔帶你見家長、又唔求婚、又唔努力工作……你問佢婚後生活如何？佢比一堆「考慮搬出去住」、「試吓去註冊處排期」、「有機會擺酒」的答案你，你都知佢誠意有限啦。

職場亦一樣，有人辭職，上司留佢唔係咩新聞，基本上九成都會傾兩句，試吓留吓，留到就唔洗煩重新請人教人，留唔到？都唔係壞事，因為佢可以請一個人工更低嘅人取代你，甚至唔請，叫同事 B、同事 C 拍膊頭做埋你嗰份。

信都交咗，入到房除咗傾留唔留低之外，仲有無其他嘢講？下篇分享吓應唔應該向上司坦白辭職真相。如果你都有職場奇聞／分享，歡迎去我 Facebook Page 交流吓。

（本文純屬作者意見，不代表香港01立場。）