【學吓逆向思維】台灣農曆七月避開刀？其實鬼節做手術存活率仲高
照舊，先講個故事。
我第一次去台灣，係前女朋友請我去（爽！）。某次佢嘅台灣朋友同我哋一齊晚飯。小弟飯後食鳳梨酥（唏，第一次去台灣嘛），順手請埋佢朋友食，佢朋友婉拒我好意。
點解？唔係台灣人唔食鳳梨酥，而係因為，佢係做護士嘅，而台灣醫護人員有不少禁忌，其中一個，就係唔食鳳梨，特別係鬼月（農曆七月）。因為鳳梨台語諧音「旺來」，食完鳳梨，就會忙到停唔到手咁話。
呢幕就係我對台灣嘅第一印象。
中共講無神論，眾多高官私下拜神係另一回事，香港就叫做國際都會，新加坡國父李光耀話自己最憎風水星座之類。在華人社會中，台灣應該最怪力亂神，滿天神佛。選總統都大把命理大師霸佔報紙頭條，台灣連股票電視台都玩扶乩，遠比只係日日講「水星逆行」、「熒惑守心」嘅香港行家有型。
迷信鬼月唔開刀 其實存活率仲高
然後早兩星期，我在台灣百無聊賴睇新聞，睇到個故事：話說，不少台灣人，特別係中南部，有個傳統迷信，就係鬼月唔好開刀。你以為冇乜受教育嘅先係咁？錯啦，連大學教授，甚至醫生本身都係咁。
於是乎，往往喺農曆六月八月，就特別多人開刀，鬼月呢，就特別少。醫院做過統計，話有時爭成10%以上，都咪話唔明顯。
以上種種，其實年年新聞都報。今年比較有趣嘅係，有人做統計，發現其實鬼月開刀，唔會特別易出事。唔止，原來鬼月開刀，存活率仲比六月八月高啲。
報道冇講點解。但至少可以諗到兩個原因：
︱第一，鬼月唔肯開刀，拖到八月嘅，往往病情只會惡化。迷信鬼月之說嘅其實有點自我矛盾。若果真係信鬼神之說，咁閻王要你鬼月死，點會extend到八月幾？至於現實中有冇得「提早開刀」？有乜影響？就留比專業醫護人員答。
︱第二，又令我諗起鳳梨酥。個個六月八月開刀，醫護人員日日旺來，多得你唔少。醫護人員都係人，人當然會犯錯，忙中特別易出錯。七月鬼都唔多隻，醫護人員冇咁忙，出錯機會應該細啲。
對付迷信 試試逆向思維
所以，真係人棄我取。金融界叫呢啲Contrarian逆向思維。人人踩到地底泥嘅股票我先買，人人仆去六月八月做手術，你記住避開；人人唔敢七月開刀，你記住去。咁樣就即使唔贏在起跑線，都可以唔使咁快衝「終點線」。
留意，呢個世界上，可以話有兩種迷信。一種真係信則有，不信則無。另一種呢？係自我實現預言，只要有人信，就會成真。
Contrarian，用落第一種迷信，比較簡單。例如做手術。仲有乜例子？例如買六合彩。買六合彩都有得Contrarian？ 是真的。讀者有福了，本人教埋你買六合彩。其中一個秘訣就係——記得，淨係買31以上的大冧把。
我上次寫完篇《九頭鳥》，居然仲有人以為我唔識數學？「大冧把易中啲嘅咩？ 你咪呃我！」對，大冧把唔會易中啲，機會應該係同細冧把一樣 （雖然，有數學家堅持大冧把真係易中啲。原因？油多一隻字上去，個波重啲喎。數學家係可以好神經的）。
大冧把唔會易中啲，但，中咗之後會點，就有關係啦！好多人鍾意用生日日期之類買六合彩。你揀大冧把，唔會易中啲，但可以避開同人撞冧把嘅機會。我估你唔想好似陳友套《黑心鬼》咁，中頭獎同幾十萬人分。呢，買咩8號18號28號果啲，更加高危。買44號就好啦。
同樣道理，買股票不妨揀啲不祥冧把，買馬不妨揀啲聽落古怪或冇人識讀嘅馬名。呢啲嘢唔影響賽事本質，但影響買嘅人。李嘉誠隻13號和記黃埔，個個股東笑住離場。反面教材？一個字。8號仔。唔睇財經新聞都識。
買凶宅 降成本 逆向思維好例子
Contrarian，用落第二種迷信，「自我實現預言」，就惡搞啲。例如乜？ 例如，本文作者唔會叫你去買凶宅。
同鬼月開刀有乜唔同？唔同在，鬼月開刀唔會拖低你存活率。但死過人，就真係影響你間屋嘅價值。點解？因為有人信，因為好多人都有啲怕間屋發生過慘案。有人信唔等於間屋就會鬧鬼，但就等於凶宅會平啲——對好多業主嚟講，慘過撞鬼。
不過話說回頭，在香港，早十年八年，買凶宅似乎係不錯的投資。原因？首先，原來好多係租或賣畀啲「唔信」嘅人，可能係教徒或者外國人。聽聞有外國人知道發生過命案都唔介意，覺得仲好，「多啲人陪佢」。喇，佢就Contrarian啦！你哋覺得係差嘅嘢，佢當係優點，邊有得輸。
二來，一切有代價，迷信都係trade off。凶宅比起普通單位嘅折讓，近年收窄不少。除咗上面講嘅原因，仲有一樣就係——有乜惡過枉死嘅惡鬼？就係上唔到車嘅人！所以最後你發現，你肯住凶宅都好，都只係平得些少，因為，大把人好似你咁諗。
對，金融上，Contrarian最難搞嘅就係，個個都Contrarian，就反而要Contra-contrarian。如果人人都咁清醒，唔要1至31，湧哂去買大冧把，以上方法，就自己玩死自己，self defeating。
不過咁，歷史話畀我哋知，人類係冇從歷史得到任何教訓。所以，記住下次都係揀鬼月開刀，同埋記得六合彩買大冧把。
當然，實務上，其實提升咗小小咁大把嘅機會率，都係冇乜分別。正如舊公司有位同事，堅持去上海要坐國泰港龍唔坐東航，原因話「安全啲」。我話，其實你機場坐出去嗰程車，點都比你坐飛機危險N倍。遇到空難，可能難過中六合彩。
（本文純屬作者意見，不代表香港01立場。）