專訪|Mike Orange搞《歎息橋》演奏會:試下做冇乜機會出現嘅事

撰文:
最後更新日期:

在第三波疫情受控下,表演場地有限度開放觀眾入場,而Mike Orange原定於7月末舉行的「《歎息橋》原聲大碟演奏會」,亦在10月16-17日舉行。他看到觀眾開始討論《歎息橋》配樂時,打算製作劇集原聲大碟,後來在湯駿業鼓勵下,才萌生舉辦演奏會的念頭:「佢聽完之後話好好聽,『你一定要做啲嘢』。我開始諗究竟仲有咩可以做,因為坊間唔係有太多類似《歎息橋》咁破格嘅劇集,佢係一個好好嘅機會畀我試一啲嘢,我就膽粗粗,試下做一個冇乜機會出現嘅事。」

撰文:劉傳謙

採訪:游大東

攝影:梁碧玲

Mike舉行《歎息橋》原聲大碟演奏會,Bowie十分支持。(梁碧玲攝)

今次演奏會沒有安排岑寧兒和黃靖分別演唱劇集主題曲《困局》和《Yours Truly》,只有樂隊演奏,Mike解釋:「既然講到係演奏會,我好想透過音符講故事。如果要聽有人唱嘅版本,其實喺各大串流平台都聽到,或者佢哋喺日後嘅演唱會都會玩;但係今次將佢當係一首作品去演奏嘅時候,佢係可以有條件冇人聲喺度。」

Mike希望今次演奏會只透過樂器演奏,因此沒有邀請岑寧兒和黃靖現場演唱主題曲和插曲,舞台設計亦從簡,讓樂迷專心享受音樂。(梁碧玲攝)

音樂主導 林保怡:未睇過套劇都可以聽咗先!

Mike亦指,今次演奏會舞台設計從簡,務求聽眾欣賞時不受畫面限制:「當冇畫面嘅時候,可能會少咗一份導向,會有更多唔知道嘅想像出現,呢個演奏會好希望可以繼續延伸。音樂係由《歎息橋》誕生,依家攞住呢啲音樂去開演奏會,可能會將觀眾引伸去另一個世界,令《歎息橋》愈來愈闊、愈來愈廣。」

《歎息橋》監製林保怡(Bowie)亦認同Mike的想法,他說:「純粹聽音樂會令你嘅幻想空間更加大,如果有朋友仲未睇過《歎息橋》都唔緊要,你可以聽咗啲音樂先。有咗畫面反而會局限咗,只係會聯想到嗰個畫面;但係如果你冇呢個畫面,你淨係聽嗰段音樂,(幻想)空間會更加大,我好鍾意將創作空間同思想畀大家去諗無限大嘅嘢。」

Bowie認為,若聽眾沒有看過《歎息橋》,更能盡情發揮幻想空間。(梁碧玲攝)

Mike邊睇劇邊作歌:諗嘅過程可以更加透徹

Mike本業並非創作影、視配樂,在為《歎息橋》作曲過程中,他直言沒有參考任何方程式,雖然會感到有點不安,但同時感到創作自由度大:「我一開始睇劇本嘅時候,發現有好多錯綜複雜嘅嘢,例如同一個場景會出現幾次,但係佢哋出自唔同角色嘅視點。我覺得呢個係套劇一個好獨特嘅嘢,我唔可以三個場景都放同一個音樂,唔係就會冇意思。」

Bowie亦指,過程中導演團隊一直給予Mike最大自由度:「我同另外兩位導演(肥波、二五)講,每一個範疇都盡量畀自由度佢哋,千祈唔好同Mike講:『如果有一首歌好似某套電視劇咁就好啦』,我哋完全唔會做呢啲事,佢鍾意點就點。」

Bowie認為給予Mike足夠自由度非常重要。(梁碧玲攝)

在創作時,Mike會邊看劇本邊寫筆記,繼而循不同方向配樂,甚至決定該情節是否需要音樂。由於Mike在創作期間並非從劇組一次過收到所有剪接好的集數,因此在創作過程中,當了解較後集數的劇情時,他經常地重作已完成的集數。他解釋:「我唔係一個全知者,而係以一個半知者,半觀眾嘅狀態完成,呢個部分其實好好玩,喺諗嘅過程可以更加透徹,因為你可以返轉頭。」

Mike坦言為《歎息橋》配樂時,雖然會因為欠缺經驗而感到有點不安,但同時認為創作自由度大。(梁碧玲攝)

Mike在創作一首配樂時,除了希望強化該場節所帶出的情緒,有時候會從角色當下心態出發,當中採用的音樂往往令人意想不到。例如其中一幕要交代Ken(陳奐仁飾)離家出走時,背景音樂卻令人感到暢快,Mike解釋這個安排是別有用心:「我唔係要同佢作對,但係我真係覺得佢心入面一直都有想離開嘅狀態,因為屋企入面媽咪咁對佢。」Bowie亦指:「我覺得當時Ken係好開心,佢會覺得好爽,終於都可以離開啦!」

Mike坦言,製作一首配樂所用的時間,要視乎自己創作時的狀態,其中最有感覺,耗時最短的,就是備受觀眾討論、道盡Thomas(林保怡飾)和Sammy(周家怡飾)心聲的插曲《Yours Truly》。他說:「本身劇情上都令我淚湧,但係我睇嗰一幕嘅時候係有音樂,可能佢哋放咗啲歌播,我就要mute咗佢,再諗究竟佢哋播緊咩。嗰首因為太有感覺啦,大約15分鐘就已經寫好咗。」Bowie亦對《Yours Truly》第一次出現,即Thomas(陳健朗飾)在比利時着Sammy(談善言飾)扭大收音機的一幕非常深刻:「睇咗好多次都會好感動,我都係,雖然我係喺現場拍,亦都要教佢哋做,但係每次去到嗰幕,我都真係會淚湧。」

點擊圖輯睇Mike Orange最喜歡幾段配樂嘅劇情:

+20
+20
+20

《彩虹橋》放片尾有原因:令大家輕鬆返啲

至於Mike耗時最長完成的是主題曲《困局》,他解釋:「首先主題曲係我同岑寧兒合寫,各自負責兩段,寫完之後就由我去編,而編時候真係覺得好難,因為《Yours Truly》只係描繪緊嗰場戲,但係《困局》描繪嘅係成套戲,必須要諗得更加透徹。」至於片尾曲《彩虹橋》,Mike坦言希望透過這段純音樂,幫助自己返回現實世界:「其實我好多時睇到某啲情節都會好鬱結,瞓唔到,我一路做,過程中要睇好多次,但係我太代入套戲啦,所以需要一首歌,希望可以回復返大家嘅情緒,令大家輕鬆返啲。」

《歎息橋》主題曲《困局》由岑寧兒主唱,並與Mike Orange一同作曲。(資料圖片)

點擊圖輯,重溫《歎息橋》精彩畫面:

+15
+15
+15

Bowie承諾出原聲黑膠碟:蝕都唔緊要

目前《歎息橋》原聲大碟只有數碼版,樂迷可透過音樂串流平台收聽,Bowie承諾將會為大碟推出黑膠唱片:「二五同我傾完之後,我即刻話支持,可能會蝕,但係都唔緊要,我覺得係應該要做嘅,依家已經冇人會做Soundtrack嘅黑膠碟啦。(唔出CD?)唔會啦,黑膠靚好多,隻碟有12吋,裏面多嘢好多。可能係限定會推出咁多隻,手快有,手慢都有。」

Bowie坦言,當初想更進一步,將《歎息橋》搬到舞台上:「其實可以再搞大佢,有更加多嘢畀觀眾睇,會唔會變成一套舞台劇呢?不過呢樣嘢就要慢慢鋪,依家先由Mike做咗個演奏會先,等其他人現場感受下,淨係聽住《歎息橋》嘅音樂會係點呢?」

Bowie打算為《歎息橋》原聲大碟推出黑膠唱片。(梁碧玲攝)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。