Frankie認MIRROR年尾缺席頒獎禮 將全力排練1月演唱會
撰文：鄧穎琪
出版：更新：
MIRROR成員陳瑞輝（Frankie）今日出席傢俬店的星級店長活動，原來他讀書時已在這間傢俬店做過兩年兼職，今日有重遊舊地的感覺。他指自己當時正在讀書，要賺錢學跳舞，主力做衣櫃、電視櫃的部門。Frankie說當時返工都會見到不少明星，最深刻是周柏豪真人很高。
Frankie讀書時原來曾在大型傢俬店做過兩年兼職。（張祖銘攝）
他又講到一些收納貼士，認為MIRROR中以呂爵安（Edan）最需要收納，而最整潔的一定是李駿傑（Jeremy），始終他拍過整理家居的節目。至於Frankie本人，他認為自己是亂中有序。
近日有傳聞指MIRROR將缺席年底的樂壇頒獎禮， Frankie證實自己都收到消息，主要因為排練演唱會，他說：「因為演唱會都好耐之後，我哋演唱會由一月開始，所以我覺得公司有咁嘅安排我都明白，如果有得參與我都想參與，但係如果為咗排演唱會排得熟啲嘅話，我都會等公司安排。」
Frankie剛去完大阪旅遊，現時正如火如荼排練音樂劇，坦言壓力大到像開演唱會緊張。（張祖銘攝）
問到是團體缺席還是個別成員缺席，Frankie說自己不太清楚，因為只是收到一句簡短的訊息通知，他坦言自己都想出席頒獎禮，並謂：「都想去頒獎禮，但係每年演唱會真係排得太趕，每年做完我哋都覺得可以再排得熟啲，寧願擺時間去排演唱會，尊重公司俾我哋嘅決定。（所以今次準備得好充足？）今次要更加準備，萬全到最Good show畀大家睇，大家會睇到好Show㗎！」
Frankie親證收到公司通知，MIRROR年底將缺席頒獎禮。（張祖銘攝）
今日有指柳應廷、Jeremy和ERROR肥仔（梁業）的餐廳陷入金錢糾紛，結業後被貼街招追數，Frankie暫時未跟他們見面，各自都有要忙的工作，他說：「我覺得面對面問好啲，我都有send個message關心佢哋，唔諗住佢會覆，祝佢心情好啲，但我覺得見到面先講好啲。」
大批粉絲帶齊應援物到場支持Frankie。（張祖銘攝）