王維基考慮參選立會 唯一政綱「換特首」
撰文:博評組
出版:更新:
距離 9 月立法會選舉仲有 116 日,江湖吹風愈來愈多。今日輪到香港電視主席王維基表態有意參選,6 月底前有最終交代。
2008 年,人稱「魔童」嘅王維基,由電訊業空降電視傳媒,喺亞視揸旗 12 日,再創辦香港電視,大家已經覺得估佢唔到。今日又突然召開記者會,話有意跳入政治「大染缸」,相信只有「佛印」羅家英先至可以表達大家嘅心情——「好難捉摸呀!」
其實維基喺商界撈得唔錯,做乜突然諗唔開,決定申請放棄加拿大國籍,留喺香港「搞政治」?
佢喺記者會話「香港去到一個關鍵時刻……要為下一代負責。」嗯,喺愈有權力愈習慣大話冚大話嘅時代,任何人做任何嘢,都可以用返同一句「萬能key」,香港人已經分唔清真心定假意。
好,唔緊要。想出嚟行,有冇政治理念先?維基話政綱佢有,3 隻字:「換特首!」忍多十幾個月冇辦法,但係萬一梁振英連任多 5 年,維基表示不能接受。佢認為家陣社會撕裂、價值觀扭曲、人人唔開心,都係因為梁特首,大家被迫陪梁生一齊講大話。
我好相信,只要換咗 CE,整個中港矛盾,香港人承受嘅壓力會好好多。
明目張膽要求「換特首」咁激進,王維基話「咪住!」:
頭先我講「我唔贊成港獨」,你會覺得我係「藍色」。我話畀你聽「我贊成自決,我覺得每一個人生存落嚟,都有決定自己前途嘅權利」,你可能會覺得我係「黃色」。我唔想咁簡單去 label,希望大家唔好用一啲太簡單嘅顏色去 label 咗一個人。
非藍非黃非本土,即係咩立場?再次召喚家英哥——「好難捉摸呀!」
可能政治就係咁難捉摸,唔似捉棋一般顏色分明。總之,王維基而家諗緊出選香港島或者新界東,因為中產多,易溝通。具體計劃/班底未定,6 月底之前,會有最終交代。
梁特首都算犀利架喇,任內激出一眾傘後、本土組織,而家連維基、舒琪呢啲本與政治不相干嘅人都有意參選。即使普選無期,但係變相做到「全民參政」,梁特首功不可沒!