【影評．殺神John Wick 2】識得睇，你會覺得第二集好睇啲

我知我知，好多人，尤其男人，非常喜歡Keanu Reeves主演的《殺神John Wick》（John Wick）…不過，老老實實，我係好一般。可能因為我太奉公守法…

我知我知，好多人，尤其男人，非常喜歡Keanu Reeves主演的《殺神John Wick》（John Wick）。型嘛，一條友，身穿名貴度身訂造西裝，以一敵百，見人就殺，有仇報仇，吓吓爆頭，面無表情，廢話少說，而開槍動作一如舞蹈般優雅，自己中槍只流少少血，敵人中槍就即死。幾過癮呀！人人在日常生活也會有點壓力，人人也只可在夢境中宣洩。唔通真係拎支槍去亂槍掃射咩。看《殺神John Wick》，背景明明是現實的世界，又好像去了超現實的江湖。代入落去，就會得到目無皇法盡情犯罪的快感。掂喎，將《射鵰英雄傳》拍成現代版，東邪西毒分別是柴灣和西環的揸fit人，真係有得諗。

不過，老老實實，我係好一般。可能因為我太奉公守法，無法認同John Wick的所作所為。係，駕駛了一世的古董車被偷了，死鬼老婆送的小狗給殺了，係好慘。挑釁John Wick的古惑仔，個樣又的確好寸。都唔使衝動到立即還拖，將仇家的下屬殺清光啩？打份工啫，各為其主，死傷者們不是似巴士司機收告票般無辜嗎？無理由李莫愁為排解個人情緒而大開殺戒，就被視為魔女；John Wick做同一動作，會變成俠士吧？成年人嘛，不懂得控制情緒的嗎？如果人人一唔開心就要還擊，咁我們去港九新界任何一間茶記吃個午餐，見到那班侍應的面口，咪無時無刻要食得相當小心？何況身懷蓋世武功，就似手持槍械，若果一受到挑釁就話要執行私刑，個社會咪好危險？好彩John Wick只係獨行獨斷咋，如果佢叫多幾個伙計一齊行動，我會更加睇佢唔起。

來到《殺神John Wick 2》（John Wick：Chapter 2），雖然同樣血流成河，感覺，又好像好了一點。因為電影情節極度強調制度的重要性。就算是天下無敵的殺手，就算是權傾全球的黑幫頭目，都要跟規則行事。你拿出血印，就有權要求曾經滴血為盟的John Wick實踐諾言，重出江湖為自己效命。John Wick拒絕，你射幾嘢大炮去將佢間豪宅炸到粉碎，也不用問責。因為，在這一個江湖，有一個類似法庭的地方，有一個類似法官的人物，會為種種爭議作出裁決。於是，John Wick雖然嬲到震，今次也要控制情緒，先為仇家執行任務，到執行任務完畢，血印被解除了，才可以光明正大展開復仇計劃。該疑似法官的人物，地位超然並獨立，不受管理層的指令所左右。你痛罵好，你求情又好，一律鐵面無私，公正執法。一切有規有矩。沒有人有什麼特權，無論你愚蠢，是衝動，還是計過度過都係要挑戰權威，最後，都係要接受被追捕的下場，要付上代價。在這個時機，我看了這一齣電影，我覺得很有警醒味道。

（文章純屬作者意見，不代表香港01立場。）