【育兒貼士】兒童腳尖行路買鞋難　成因或與大腦發展、自閉症有關

BB用腳尖行路好可愛？香港理工大學康復治療科學系助理教授邊慧敏博士指，BB剛開始學習行路時，會嘗試扶着梳化、枱邊步行，短時間以腳尖走路屬正常現象。「BB有好奇心嘛，佢想拎高啲嘅嘢，咪會用腳尖行，令自己高啲。」她說，不過假如習慣持續，甚至到小學仍以「腳尖先落地」的方式來走路，便有需要向專業人士求診。

原因或與大腦、肌肉發展有關

「大部分小朋友用腳尖行路係成因不明，但少部分有可能與大腦痙攣、肌肉萎縮和自閉症有關，所以家長宜先帶小朋友做專業檢查，確定係咩原因，對症下藥。」邊博士說：「而家長亦不宜過早教小朋友行路，佢哋雙腳未發育好、身體未平衡到就扶住腋下畀佢學行，又或者放BB坐學行車，對佢哋學行都有壞影響。」她強調，BB坐學行車並不能學會行路，而且他們只需用腳尖輕撥地面，便能使學行車移動，減少腳跟的刺激和活動，「外國亦有資料顯示，好多意外係由學行車引起，例如撞到餐枱令熱咖啡照頭淋，好危險！」

腳跟變短　長期變「鴨仔腳」

邊博士說，以她的臨床經驗，看過較嚴重的個案是一位約8歲的男生，長期以腳尖行路，「好似着住高踭鞋咁行」，結果腳尖的肌肉及骨骼過份發達，而長期沒有「落地」和著力的腳跟卻因而變短、變小，腳掌形狀變成「前闊後窄」的「鴨仔腳」。其母大呻市面根本找不到合適的鞋子，而男孩亦要拉筋、打石膏等進行治療，把腳跟「拉長」。

兒童長期以腳尖行路，如若置之不理，長大後會引起膝蓋關節或腰部疼痛，而且習慣持續的時間愈長，便需要更長的時間治療和糾正。

責罵無用　建議學溜冰、行直線

許多家長對於孩子的姿勢和行為，都會以提醒或責罵來希望孩子牢記於心，從而改善。不過，邊博士說：「行路係一個唔需要大腦思考嘅行為，鬧佢而佢記得嘅時候咪放返腳踭落地，其餘時間都係會用返腳尖行。」

當幼兒學習行路時，家長忌操之過急，「每人都有不同嘅發展速度，小朋友肌肉同平衡發展成熟，就會開始識扶住物品站立同慢慢學行，唔需要同其他人比較，亦唔需要專登教佢」。惟她提醒家長要提供一個合適的環境供小孩子學習，例如有充足的空間讓孩子爬行，亦有梳化等穩健的物品讓孩子抓扶走路。

她亦建議家長可以讓小朋友參與溜冰、滾軸溜冰或踏單車等運動，可以運用全部腳掌的部分，鍛鍊腳跟的肌肉，回復腳跟先着地的正確步行姿勢。而在家中，家長也可以教孩子以腳跟貼腳尖的姿勢，行走直線，幫助訓練小朋友用腳跟行路。