【西貢村屋停電】爬樹出村返工記：屋企冇電冇WiFi ，不如返工算

網友Kenji家住西貢，噚晚喺山竹肆虐期間，佢有幾個隔離鄰舍嘅屋頂被吹走，自己個單位都突然斷電，幾小時後，雪櫃嘅肉類亦進入發臭階段，好不容易捱到今朝又要返工。

一早起身，Kenji犯險走出村口，經歷咗路上無數棵塌樹，村口條路淹到就變水塘，中間仲要行經高於腳踝深度嘅水漥，走到出大馬路已經冇咗成個鐘，加埋搭車搭成3個幾鐘頭，差唔多用咗5個幾鐘頭返工。

雖然咁嘅情況仲要返工完全係無可奈何，但佢黑色幽默講咗句：「屋企冇電冇WiFi，我不如返工算。」

返到公司已經4點半，離放工唔夠2個鐘，但Kenji都要爭取喺放工時間前，幫手機同尿袋叉足電，放工後再去補購食物。佢𠵱家只希望條路啲樹會被清走，晏啲可以順利返去嗰個唔知幾時供番電嘅村屋單位。

問佢返到屋企冇電到底有咩做，佢話：「原來冇電好多嘢做唔到。𠵱家唯有留喺屋企，得閒望下條街，望到悶就瞓下覺，好似隻貓咁囉。」