寮屋喺多數人心目中，都總係溶溶爛爛、破舊不堪，同惡劣嘅生活環境畫上等號。但其實寮屋同香港歷史息息相關，加上每間寮屋都由屋主一手一腳搭建；各具特色之餘，當中甚至可以體現出一種對生活嘅能動性。由藝術家黃淑琪發起，「可以居」係一個探討居住空間嘅企劃。繼2015年推出《可以居－白沙澳鄉》後，團隊喺2018年以寮屋為題，推出《可以居－想像寮屋》，除咗探討香港嘅寮屋歷史，仲想帶讀者去重新思考居住嘅本質同可能性。