【午夜場】《頭文字D》陳冠希余文樂世紀合作 SORRY FOR U BRO
撰文：許育民
出版：更新：
用宿敵去形容兩位真不足為過。由余文樂加盟樂壇開始，就好似踩到陳冠希條尾，頒獎禮撞膊事件，然後又話爭阿嬌（鍾欣潼），總之同場之後就冇日安寧。直至近年鬥到去潮界，惹得Edison都要做鍵盤戰士掀起罵戰。
其實兩位又唔係冇合作過，為搵食，真係如Edison在IG寸余文樂所講︰「SORRY FOR U BRO / BUT EVERYONE NEED TO MAKE A LIVING」再不咬弦，都要合作拍埋套《頭文字D》先。
其實作為香港改編日漫作品，《頭文字D》真係算見得人，好過不少日本改編作。
其實兩位自撞膊事件後，都有和好過（表面係），至少在《無間道II》首映禮上有攬晒笑晒，以證冰釋前嫌。然後兩位又在《頭文字D》內聚頭，主角無得爭，一定係周杰倫做拓海，咁作為拓海的半個啟蒙老師這個重要角色高橋涼介，就由陳冠希飾演，余文樂就飾演拓海成長中的一位對手中里毅。
戲中二人都算有交流，其中跟杜汶澤飾演的阿木，就有場掛名鬥車，講到掛名，因為根本唔使鬥，阿木已經自炒埋山坡埋單。不過在這段戲中，就見到陳冠希同余文樂惺惺相惜好老友咁，仲坐埋同一架車，呢種場面應該會成為絕響，再有都難。
中里毅角色戲份不多，但就被他發現有拓海這個隱世高手。
其實拍攝時，已傳聞導演劉偉強及兩位的契爺黃秋生，都不時做和事老要兩位和好，不過有前輩在就客客氣氣，一擰轉背又係暗鬥過。其實鬥足十幾年，由樂壇到影壇到潮壇，都要佩服兩位夠晒堅定，堅定不移地鬥到底。
陳冠希做有錢仔高橋涼介，度身訂造咁。