[Apink專訪]初瓏香港冇食填鴨好失望 娜恩同PSY跳New Face勁緊張
韓國女團Apink 6位成員初瓏、恩地、寶美、娜恩、南珠和夏榮自2月之後，上星期六（9月23日）再度來香港開show，一年可以見到Apink兩次絕對係香港Panda（Apink粉絲）嘅福份，而《香港01》當然把握機會找來Apink進行專訪為香港Panda講吓心底話！Panda們都知道Apink來到香港之後幾乎冇休息，馬不停蹄接受訪問，幸好一聽到我哋提起香港Panda即時精力十足，十分疼愛粉絲呢！
攝影：江智騫 主辦：德碩文化 場地提供：美麗華酒店
由2013、2015年的MAMA頒獎禮，到今年2月的《Pink Aurora》Asia Tour，Apink已經來過香港多次，當問到Apink在香港有冇咩好想做但仲未做到時，恩地就表示：「雖然我哋去過好多國家，但成日都因為要跑行程，好多時都感受唔到當地出名嘅嘢，覺得好可惜！」而隊長初瓏早前就同朋友秘密來香港旅遊，佢自爆：「當時有搭過地鐵同纜車，覺得好有趣！而且更有同朋友特登去搵食，我就負責跟住佢哋。最有印象係香港好多嘢食都好好味，好似冇唔好味嘅食物！」初瓏又講到本身想去食北京填鴨，但之後發現原來要提早成個月預約，今次再來香港都係冇得食，希望Apink下次來香港之前記得book定位，又或者搵香港Panda幫手，就一定有好嘢食啦！
有留意Apink新聞嘅Kpop迷，都可能聽過在韓國讀高中3年級的Panda，如果去Apink fan meeting嘅話都會俾恩地輕打一下，恩地就解釋：「事源一次有位高3 Panda去咗我哋fan meeting，佢就話我係高3學生就嚟要參加高考，不過宜家竟然嚟咗見Apink，姐姐不如你打我一下，等我打起精神好好讀書啦！就咁開始，高3嘅Panda嚟見面嘅時候，都會叫我打佢哋一下！」不過恩地又提到令佢最開心係，有啲俾佢打嘅Panda本身成績麻麻，打完之後就俾心機讀書，更考到全校第2名，仲去到自己想去嘅大學，令Apink都感到好滿足！
通常韓國藝人來香港都會講起澳門，而Apink的娜恩早前同大前輩PSY就去澳門拍咗《New Face》的MV，娜恩表示：「因為PSY本來就係大前輩，第一次見到PSY時都好緊張，在練習和拍攝時因而很努力，幸好感到PSY前輩很隨和，其實只係我自己在緊張！」而講到PSY《New Face》的舞蹈原來也不容易，娜恩就表示：「《New Face》的舞蹈要用盡全身力量來跳，而且PSY前輩跳的舞一向都很有活力，所以我也十分努力！」
我們01韓迷的facebook專頁Kpop 01已經開始喇！想知道更多韓國娛樂、飲食、玩樂、時尚資訊，快點去給like吧：https://www.facebook.com/hk01.kpop/