《花樣青春》節目組為綁WINNER去澳洲呃YG梁鉉錫　着囚衣坐飛機？

上個月韓國男團WINNER就已經比羅䁐錫PD「綁」咗出國，拍攝《新西遊記4》外傳《花樣青春》WINNER篇。不過因為WINNER會出演《花樣青春》呢個消息一早已經通晒天，令到節目組好苦惱要點樣先可以呃到WINNER四子JINU、HOONY、宋旻浩同姜昇潤，成功「綁」佢哋出國！

原本《花樣青春》節目組就諗，用拍攝私家車廣告嚟呃WINNER，最後等佢哋一上車就直接送晒去機場，而呢個計劃就連YG Entertainment社長梁鉉錫（又譯：楊賢碩）都唔知㗎！《花樣青春》節目組更夾埋YG Entertainment一眾經理人、廣告組、服裝組、髮型組、化妝組，並請嚟真正嘅廣告導演，租咗一個大型攝影場，先同WINNER拍室內鏡頭，真嘅一樣！而因為現場只得一架車，導演又再呃WINNER，話後期會有好多CG效果，叫佢哋自行發揮想像！

WINNER四週年卻捱轟　宋旻浩助陣填詞Epik High新歌被指歧視女性

今集《花樣青春》WINNER篇收視高達4.3%，相信高潮位一定係羅䁐錫PD現身一幕。「綁架」WINNER故事劇情先設定喺室外鏡頭嗰陣，原本正在拍攝嘅廣告導演冇上到車，就提議叫車上某人拍攝，而呢個人就係羅䁐錫PD喇！佢一現身就同WINNER講：「好啦！咁宜家開始就由我嚟拍攝！」又驚又喜嘅WINNER當然不停問咩事咩事？點解咁㗎？雖然佢哋一早都已經準備隨時都有可能被人「綁」走，但就冇諗過羅䁐錫PD親自出馬。不過無計啦！羅䁐錫PD大人聯合埋咁多人策劃呢個行動，又點會輸呢？而下集《花樣青春》就會繼續講WINNER係西澳洲柏斯嘅生活點滴，INNER CIRCLE（WINNER粉絲）唔會錯過啦！

更多WINNER圖片

《花樣青春》WINNER被「綁」片段

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/