秀智送「倒穿橡膠鞋」俾李敏鎬　《當你沉睡時》同李鍾碩太sweet?

今日Kpop界大新聞一定係missA秀智同李敏鎬分手，一對韓星情侶童話被幻滅！早年韓國男團MBLAQ前成員李准喺綜藝節目《Radio Star》上面一句「韓國娛樂圈就好似動物王國一樣咁亂！」Ａ韓星明明同緊Ｂ君一齊，又突然同Ｃ一齊，然後B又會同Ｄ拍拖等，所以李准話要搵女朋友嘅話就一定唔會搵Kpop圈內人。雖然早前宋宋CP就好成功，宋仲基、宋慧喬拍拖1年幾就已經火速結埋婚，不過宋仲基就少有戀情同緋聞傳出，但眾所周知，宋慧喬曾經同過李炳憲，以及玄彬拍拖。宜家李炳憲就同咗李敏貞結婚，玄彬就同左姜素拉拍拖。至於之後又會發生咩事就未知，不過已經見到韓國明星感情關係真係幾複雜！

不知道missA秀智同李敏鎬分手後會點？但其實韓星情侶分開後做回朋友，又有幾多個可以做到？正如昨日少女時代潤娥同李昇基同場出席《2017 Asia Artist Awards》（2017 AAA）都一樣零交流啦！事實上，韓星分手就好似有周期一樣，今年8月1日FT Island成員崔鐘訓同體操妖精孫延在、仲有前After School成員U-IE同康男，就同日宣佈分手，而BoA同周元3日前則宣告一年情玩完！

今日李敏鎬同missA秀智3年情告終，雖然秀智所屬的JYP Entertainment就講到因為涉及私生活，兩人分手時期同理由都唔方便透露。但外界都猜測係因為李敏鎬少咗時間陪秀智？定真係好似金九拉喺《Radio Star》咁講「秀智真係等唔到呢？」秀智曾經喺節目上透露過「我好珍惜佢（李敏鎬）」，又講過自己手機入面有好多佢哋拍拖同好sweet嘅相、兩人拍拖兩週年仲開party邀請朋友一齊慶祝！之前有時間仲會同埋金宇彬、新慜娥（又譯：申敏兒）4個人去Double Dating，不過此情此景都可一不可再，其實都真係幾可惜！

李敏鎬秀智分手　應驗金九拉《Radio Star》預言「秀智等不了！」

李敏鎬雖然貴為頂級韓星，但其實同普通韓國男人一樣，唔係怕當兵，而係怕服役期間女朋友等唔到就同自己講「不如我哋算啦」或者「我哋分手啦」！韓國人將男朋友係軍人嘅女仔叫做「橡膠鞋」，因為唔能夠成日同服役中嘅男朋友見面同聯絡，更有句說話指女仔如果變心嘅話，就會叫呢個女仔做「倒着穿橡膠鞋」（指對方嘅心已經變咗嘅意思）。其實李敏鎬雖然服緊役，但佢係以社會服務要員身份當兵，基本上工作時間係朝9晚5，又唔使喺軍營寄宿，理論上佢應該有機會同秀智保持緊密聯繫。所以今次李敏鎬同秀智為乜分手，真係引起Kpop界熱烈討論。

【2017 AAA】少女時代潤娥、李昇基　分手後首次同場零交流

由於眾說紛紜，不少韓國網民更大膽推測：「唔通秀智因為拍《當你沉睡時》撻着咗李鍾碩？」送對「倒着穿橡膠鞋」俾李敏鎬？無可否認，秀智同李鍾碩因拍《當你沉睡時》行得好埋，兩人亦完全唔避嫌，照樣上傳合照或者劇照去Instagrma。特別是秀智，可說是10張相中就有1張會見到李鍾碩，究竟秀智只係純粹想照顧《當你沉睡時》劇迷，定係真心upload呢啲相，又抑或佢覺得清者自清不妨大方一點呢？

李敏鎬同秀智一齊之後，秀智呢個韓國「國民初戀」就唔再係初戀！宜家兩人分手，不過都希望長腿oppa李敏鎬同秀智下一段感情會有好結果。而喺屏幕前嘅粉絲們，人生又再有希望喇！俾啲心機，下一個李敏鎬太太可能會係你啊！

更多李敏鎬、秀智、李鍾碩圖片：

下載《香港01》App，更多韓星靚相、影片率先睇！

iOS：http://bit.ly/hk01app-iOS-download

Android：http://bit.ly/hk01app-Android-download

我哋01韓迷嘅facebook專頁Kpop 01已經開咗喇！想知道更多韓國娛樂、飲食、玩樂、時尚資訊，快啲去畀like啦：https://www.facebook.com/hk01.kpop/