Super Junior東海銀赫現身《馬家過聖誕》 黎諾懿:我姪女喊出嚟!

撰文:
最後更新日期:

Super Junior東海、銀赫現身TVB的《馬家過聖誕》,不論馬家定係ELF都好驚喜!(網上圖片)

ELF(Super Junior粉絲)捕足一星期一連5集嘅TVB綜藝《馬家過聖誕》,昨晚終於等到Super Junior成員東海、銀赫現身喇!SJ東海同銀赫唔單止狂曬普通話,仲學埋廣東話:「你好、多謝、好好食啊!好味同埋聖誕快樂」,就連神之馬壯黎諾懿接受《香港01》電話訪問時都大讚:「東海嘅普通話非常好,雖然有翻譯在場,但都可以直接溝通!」東海真係不愧為當初long stay喺台灣活動嘅Super Junior-M成員,冇忘記中文啊!

馬壯黎諾懿多次大讚SJ東海、銀赫好nice!(網上圖片)

喺《馬家過聖誕》中,劉丹、張達倫同黎諾懿就同Super Junior東海、銀赫一齊食飯。喺錄《馬家過聖誕》嗰陣,東海同銀赫加埋其他Super Junior成員就正忙緊8輯《PLAY》,以及12月15至17日舉行嘅《SUPER SHOW 7》首爾演唱會。馬壯黎諾懿再補充:「其實我本身都識Super Junior,今次好驚喜可以請到佢哋!本身韓星畀我嘅感覺好似要出動一隊大軍隊咁,但東海、銀赫今次只係帶咗1位助手嚟,同埋佢哋真係好nice!」

張達倫非常好人,仲喺《馬家過聖誕》幫PA拎Super Junior簽名!(網上截圖)

而昨晚張達倫喺《馬家過聖誕》中,突然拎咗Super Junior《U》首張單曲CD出嚟畀東海、銀赫簽名!問到馬壯黎諾懿究竟係張達倫自己鍾意Super Junior定係幫人拎簽名時?黎諾懿回應:「其實係我哋1位PA好鍾意Super Junior所以幫佢簽嘅,當時東海、銀赫仲準備咗一人一隻簽名新碟送畀我哋。之前我都有upload咗一張簽名衫嘅相上網,其實我姪女都好鍾意Super Junior,呢個係我送畀佢嘅聖誕節禮物。當時東海同銀赫仲問我夠唔夠?我姪女收到嗰陣仲喊咗出嚟啊!東海同銀赫真係好nice,有求必應,拍攝都非常順利!」記者都明白,其實拎得出有返咁上下歷史嘅Super Junior《U》首張單曲CD出嚟,相信呢位PA都係一位真愛ELF,可以喺工作時見到自己偶像真係好幸運嘅事啊!

SJ銀赫一見到《U》都即刻話:「哇,係我哋好耐之前(嘅碟)。」(網上截圖)

馬壯黎諾懿都有幫姪女拎SJ東海、銀赫嘅簽名衫,係好好嘅聖誕禮物啊!(網上圖片)

+12
+12
+12

馬壯黎諾懿表示知道Super Junior嚟緊會喺香港開《SUPER SHOW 7》演唱會,問到佢會唔會去睇呢?黎諾懿就話:「如果有邀請當然會去!」《SUPER SHOW 7》香港場會喺2月10日舉行,如果馬家會再拍特輯嘅話,建議馬家拍返個《馬家過情人節》,今次仲可以邀請半完整體嘅Super Junior一齊拍啦!

劉丹、張達倫、黎諾懿、Super Junior東海、銀赫祝大家聖誕快樂!(網上截圖)

SHINee鐘鉉出殯 Key淚流不止由溫流安慰Super Junior扶靈

下載《香港01》App,更多韓星靚相、影片率先睇!

iOS:http://bit.ly/hk01app-iOS-download

Android:http://bit.ly/hk01app-Android-download

我哋01韓迷嘅facebook專頁Kpop 01已經開咗喇!想知道更多韓國娛樂、飲食、玩樂、時尚資訊,快啲去畀like啦:https://www.facebook.com/hk01.kpop/



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。